Олунньу 7-9 күннэригэр Чурапчы нэһилиэгэр номоххо киирбит милииссийэ майора, Саха сиригэр бастакытын ыытыллыбыт ыспартакыйаадаҕа мас тардыһыытыгар чөмпүйүөн Гавриил Романович Десяткин—Күүстээх Дэһээккин кэриэһигэр мас тардыһыытыгар өрөспүүбүлүкэ чөмпүйэнээтэ ыытыллыаҕа.
Күрэхтэһиигэ барыта холбоон 500-кэ ыспарсымыан кыттара күүтүллэр. Санатан эттэххэ бу чөмпүйэнээт XXII-с “Манчаары” Оонньууларын 1-кы квалификационнай күрэхтэһиитэ буолар. Күрэхтэһиигэ эр дьон, дьахталлар уонна бэтэрээннэр путевка иһин киирсиэхтэрэ.
— Эр дьоҥҥо: 60 кг диэри, 65, 70, 75, 80, 90, 105, 125 кг уонна 125 кг үөһээ.
— Дьахталлар: 50 кг диэри, 55, 60, 65, 75, 85 кг уонна 85 кг үөһээ.
— Бэтэрээннэргэ: 65 кг диэри, 75, 85, 95 кг уонна 95 кг үөһээ.
Күрэхтэһии Александр Федотов аатынан успуорт уораҕайыгар буоларынан сибээстээн, Чурапчы нэһилиэгэр олунньу 7-9 күннэригэр сарсыарда 9 чаастан киэһэ 20 чааска диэри Курашов аатынан перекрестоктан саҕалаан Ленин аатынан уулусса (ШКМ-ҥа диэри) айан суола сабылларын туһунан “Чурапчы нэһилиэгэ” тыа сирин түөлбэтин дьаһалтата иһитиннэрэр.
Оттон успуорду сэҥээрэр өрөспүүбүлүкэбит олохтоохторугар итиэннэ ыраахтан кыайан айаннаан кэлбэт успуорду таптааччыларга анаан быһа биэриини «Саха» НКИХ ханаалыгар көрдөрүөхтэрэ.
Сэмэн ЖЕНДРИНСКЭЙ суруйуута,
Дьулустаан СЕРГЕЕВ (ЯСИА) хаартыскаҕа түһэриилэрэ.