Быйылгыттан саҕалаан, “Кыайыы ымыыта” (“Талисман Победы” улууска Сыл бастыҥ бырайыагын тэрийиитинэн, улууспут, нэһилиэктэр дьаһалталарын өйөбүллэринэн, анал байыаннай дьайыыга сылдьар биир дойдулаахтарбытыгар анаан таҥас кэмпилиэгин тигэр иистэнньэҥнэр куонкурустара тохсунньу 27 күнүттэн саҕаланна.
“Быйыл биһиги улууспутуттан сэттэ хамаанда: Одьулуун, Хадаар, Хоптого, Соловьев, Кытаанах, Төлөй, Мугудай нэһилиэктэриттэн кытта сылдьаллар.
Хас биирдии хамаандаҕа нэһилиэк дьахталларын Сэбиэтиттэн, “Арассыыйа Ийэлэрэ” уопсастыбаннай түмсүүттэн, идэтийбит иистэнньэҥнэр уонна оскуола үөрэнээччилэрэ бааллар. Иистэнньэҥнэр олохтоох дьаһалта, тэрилтэ салайааччылара өйөбүллээх, бэйэлэрин нэһилиэктэригэр иистэнэр сир тэринэн, барыта холбоон 7 маллаах 1 кэмпилиэги тигиэхтээхтэр, онно киирэр: үөһэ, аллара өттүлээх ис таҥас, үөһэ, аллара өттүлээх флис матырыйаалтан көстүүм, сирэйи хаххалыыр балаклава, кээнчэ (кулуку), мал уктар мөһөөччүк. Күрэхтэһии, “Кыайыы ымыыта” сыл бастыҥ бырайыагын иитинэн ыытыллар. Түмүгү, олунньу 2 күнүгэр иһитиннэриэхтэрэ. Дьүүллүүр сүбэҕэ өрөспүүбүлүкэтээҕи “Илии сылааһа” иис күрэҕин кыайыылаахтара үлэлиэхтэрэ, бэрэссэдээтэл Надежда Ахматова”, — диэн улуустааҕы дьахталлар Сэбиэттэрин бэрэссэдээтэлэ Анастасия Афанасьева кэпсээтэ.
Бээтинсэҕэ, ол эбэтэр олунньу 2 күнүгэр, куонкурус түмүктэнэн, үлэлэр тэрийээччилэргэ туттарыллыахтара. Кыайыылаахтар үлэ хаачыстыбатынан быһаарыллыахтара.
Сэмэн Жендринскэй