Былырыыҥҥыттан саҕалаан, “Кыайыы дьаралыга” (“Талисман Победы”) улууска Сыл бастыҥ бырайыагын тэрийиитинэн, Чурапчы улууһун, нэһилиэктэр дьаһалталарын өйөбүллэринэн, анал байыаннай дьайыыга сылдьар биир дойдулаахтарыгар анаан таҥас кэмпилиэгин тигиигэ иистэнньэҥнэр күрэхтэрэ тохсунньу ый бүтүүтүгэр ыытыллар.
“Былырыын сэттэ хамаанда эбит буоллаҕына быйыл онуолар. Старт сарсыарда 11 чаас 10 мүнүүтэ ааһыыта бэриллибитэ уонна киэһэ 17 чааска түмүктээтилэр. Кыайыы туһугар диэн уон хамаанда иһигэр ийэ оҕотун кытары, аҕас-балыстыылар кыттыыны ыллылар.
Иистэнньэҥнэр олохтоох дьаһалта, тэрилтэ салайааччылара өйөбүллээх, бэйэлэрин нэһилиэктэригэр иистэнэр сир тэринэн, барыта холбоон 3 таҥы тиктилэр онно киирэр: эккэ кэтэр таҥас үөһэ, аллара өттө, флис матырыйаалтан куурка. Күрэхтэһии “Кыайыы дьаралыга” – “Сайдыына” Мугудай нэһилиэгин уонна “Чурапчыына” Чурапчы нэһилиэгин дьахталларын сүбэлэрин улуустааҕы дьахтар сүбэтин уопсай үлэтин иитинэн ыытыллар”, — диэн улуус дьахталларын Сэбиэтин бэрэссэдээтэлэ Анастасия Афанасьева кэпсээтэ.
Дьүүллүүр сүбэ састаабыгар: СӨ уус-уран оҥоһуктарын норуотун маастара, СӨ дьарыктаах буолуу сулууспатын бочуоттаах үлэһитэ Надежда Ахматова, “Сайдыына” Мугудай нэһилиэгин дьахталларын сүбэтин бэрэссэдээтэлэ, “Кыайыы дьаралыга” бырайыак ааптара Екатерина Захарова, “Чурапчыына” Чурапчы нэһилиэгин дьахталларын сүбэтин чилиэнэ, иис сыаҕын хаһаайката Аина Анемподистова үлэлээтилэр.
Кыттааччылары билиһиннэрэр буоллахха: Чурапчы нэһилиэгиттэн Алена Тимофеева 8 саастаах кыыһынаан Эдалиналыын, Евдокия Бурнашева 13 саастаах кыыһынаан Алисалыын, Ольга Данилова 14 саастаах балтытынаан Айыыналыын, Кытаанах нэһилиэгиттэн Акулина Владимирова 14 саастаах кыыһынаан Валериялыын, Төлөй нэһилиэгиттэн Антонина Нестерова 15 саастаах кыыһынаан Айааналыын, Мырыла бөһүөлэгиттэн Людмила Никитина 9 саастаах уолунаан Айгыллыын, Хайахсыт нэһилиэгиттэн Оксана Кириллина 12 саастаах кыыһынаан Лианалыын, Одьулуун нэһилиэгиттэн Фекла Малышева 17 саастаах кыыһынаан Танялыын, Чурапчы нэһилиэгиттэн Ольга Дьячковская 6 саастаах кыыһынаан Айыыналыын, Александра Матвеева 14 саастаах кыыһынаан Олесялыын иистэннилэр.
Түмүккэ, Кылаан кыайыылааҕынан – Чурапчы нэһилиэгиттэн Алена Тимофеева кыыһынаан Эдалиналыын буоллулар. Бастакы үрдэл – эмиэ Чурапчы нэһилиэгиттэн Ольга Данилова балтыта Айыыналыын, иккис үрдэл Чурапчыттан Евдокия Бурнашева кыыһынаан Алисалыын, үһүс үрдэл Мырыла бөһүөлэгиттэн Людмила Никитина уолунаан Айгыллыын. Кинилэри сэргэ “Ыраас сииктээх иистэнньэҥ” номинацияҕа Ольга Дьячковская, “Сатабыллаах иистэнньэҥнэр” номинацияҕа Оксана Кириллина кыыһынаан Лианалыын, “Кыһамньылаах иистэнньэҥнэр” номинацияҕа Александра Матвеева кыыһынаан Олесялыын, “Түргэн туттунуулаах иистэнньэҥнэр” номинацияҕа Акулина Владимирова кыыһынаан Валериялыын, “Кэскиллээх иистэнньэҥнэр” номинацияҕа Антонина Нестерова кыыһынаан Айааналыын, “Дьаныардаах иистэнньэҥнэр” номинацияҕа Фекла Малышева кыыһынаан Танялыын тигистилэр.
Күрэхтэһии сүрүн успуонсардарынан “Добун”, “Афанасий”, “Эр Бэрдэ”, “Ситим”, “Туску” маҕаһыыннар, Мугудай нэһилиэгиттэн норуот маастара Ульяна Кривошапкина, «Сайдыына», «Чурапчыына» дьахталлар сүбэлэрэ буоллулар.
Сэмэн ЖЕНДРИНСКЭЙ. Хаартыска Анастасия Афанасьева тиксэриитэ