Чурапчыга көҥүл тустууга эр дьоҥҥо өрөспүүбүлүкэтээҕи турнир буолла

Бүгүн А.И.Федотов аатынан саалаҕа көҥүл тустууну сэҥээрээччилэр, спортивнай уопсастыбаннас, улууспут олохтоохторо  оҕолорго ССРС чөмпүйүөнэ, Н.Н. Тарскай бирииһигэр улахан дьоҥҥо Саха Өрөспүүбүлүкэтин икки төгүллээх чөмпүйүөнэ, Саха Өрөспүүбүлүкэтин физическэй культураҕа уонна спорка үтүөлээх үлэһитэ, Арассыыйа физическэй культураҕа уонна спорка туйгуна, Чурапчы улууһун, Чурапчы уонна Арыылаах нэһилиэктэрин бочуоттаах олохтооҕо Семен  Морфунов үбүлүөйдээх 75 сааһын чэрчитинэн  бырааттыы Морфуновтар бириистэригэр тэриллибит өрөспүүбүлүкэтээҕи аһаҕас турнирга муһуннулар.

Күрэхтэһии үөрүүлээх аһыллыытыгар Семен Семеновичка улууспут баһылыга Степан Саргыдаев, улуус мунньаҕын бэрэссэдээтэлэ Яков Оконешников, Чурапчытааҕы судаарыстыбаннай институт ректора Иннокентий Готовцев, нэһилиэктэр баһылыктара, тэрилтэ салайааччылара, Семен Морфунов үөлээннээхтэрэ, спорду сэҥээрээччилэр эҕэрдэ тылларын эттилэр, наҕараадалары, бэлэхтэри туттардылар итиэннэ бүгүҥҥү күөн күрэс кыттыылаахтарыгар ситиһиилэри баҕардылар.

Маны таһынан  улууспут баһылыга Степан Саргыдаев быйыл Иван Ярыгин кубогар чаҕылхай тустууну көрдөрбүт, үрүҥ көмүс призер буолбут Константин Капрыновка, кини тренеригэр Егор Пономаревка эҕэрдэлээн, үөрэн, долгуйан  туран харчылаах сэртипикээттэри туттарда, Болтоҥо нэһилиэгин баһылыга Сергей Ефремов уонна Чурапчы көҥүл тустуутугар ыалдьааччылар эмиэ ис сүрэхтэриттэн инникитин да ситиһиилэри баҕаран туран харчынан бэлэх ууннулар.

Наталья Сибирякова, ааптар хаартыската, видеота