2025 сыл, тохсунньу ый 15 күнүгэр, Егор Борисов аатынан киин архыып-бибилэтиэкэ ааҕар саалатыгар “Каллиграфическэй буочар” диэн Аан дойдуга илиинэн суруйуу күнүгэр аналлаах тэрээһин ыытылынна. Тэрээһин сүрүн сыалынан — сахалыы сурукка-бичиккэ болҕомто ууруу, илиинэн суруйууга убаастабылы үөскэтии, кыраһыабайдык, кэрэтик суруйарга дьулуһуу буолар.
Ааҕааччыны кытары үлэлиир салаа исписэлииһэ Матрена Николаевна Захарова урукку ыраастык суруйуу уруоктарын сөргүтэн, буукубалар хайдах суруллалларын көрдөрөн кэпсээтэ, суруйан холонорго эрчиллиилэри оҥоттордо, итиэннэ “Графология” нөҥүө буочар киһи майгытын–сигилитин быһаарарын туһунан сиһилии кэпсээтэ. Биэчэр саамай муҥутуур түгэнинэн “Бастыҥ буочар” диэн күрэх буолла. Манна араас идэлээх, оскуола оҕотуттан, аҕам саастаахтарга тиийэ кытыннылар.
Кыттааччылар биир дойдулаахпыт, норуодунай суруйааччы В.Н. Егоров “Одьулууннар” диэн кэпсээниттэн быһа тардыыны сыыһата суох, саамай кэрэ буочардарынан устан ыллылар.
Барыта 22 үлэ толоруллан, Вера Платонова бэрэссэдээтэллээх Анна Капрынова, Мария Пестерева састааптаах дьүүллүүр сүбэ кыайыылаахтары быһаарда.
Күрэх түмүгүнэн, 1 миэстэ пенсионнай пуонда исписэлииһэ Анна Платонова, 2 миэстэ – Лилия Степанова – пенсионнай пуонда исписэлииһэ, 3 миэстэ – Ирина Джанкабулова бочуоттаах сынньалаҥҥа олорор Чурапчы нэһилиэгин олохтооҕо буоллулар.
Чурапчы улууһун Бочуоттаах олохтооҕо, үлэ бэтэрээнэ Иван Петрович Пономарев, пенсионнай пуонда үлэһитэ Надежда Иванована Говорова “Каллиграфия маастардара” анал аакка тигистилэр.
Манна даҕатан эттэххэ, Семен Новгородов аатынан Чурапчы орто оскуолатын алын сүһүөх кылаас үрдүкү категориялаах учуутала Луиза Егоровна Максимова салайар 4 “а” кылааһын үөрэнээччилэрэ: Алиса Егорова, Тимур Васильев, Валя Илларионова, Аня Килибеева саамай-саамай кыраһыабай, ыраас буочардарынан, кэлбит дьону бука барыларын улаханнык соһуттулар, сөхтөрдүлэр. Киин бибилэтиэкэ үлэһиттэрин ааттарыттан анал бирииһинэн наҕараадаланнылар.
Маннык күрэхтэр дьиэ-кэргэн, тэрилтэ, уопсастыбаннай түмсүүлэр истэригэр, мэлдьи көхтөөхтүк ыытыллан, илиинэн суруйуу умнуллан хаалбакка кэрэхсэнэ турдун. Бүгүҥҥү үлэлэр нэдиэлэ устата бибилэтиэкэ саалатыгар быыстапка буолан туруоруллуохтара, интэриэһиргиир дьону кэлэн көрөргүтүгэр ыҥыраллар.
Сэмэн ЖЕНДРИНСКЭЙ