Саха биллиилээх Судаарыстыбаннай диэйэтэлэ Иван Винокуров аатын үйэтитии үлэтэ салҕанар.
Кулун тутар 26 күнүгэр Чурапчы нэһилиэгин киинигэр Винокуровка анаммыт пааматынньыкка улуус салалтата, тэрилтэ салайааччылара, дьокутааттар сибэкки уурдулар. Иван Винокуров сырдык аатыгар сүгүрүйэн, кэриэстээн улууспут баһылыгын солбуйааччылара Алексей Лобанов, Мария Кронникова, Чурапчытааҕы түмэл дириэктэрэ Афанасий Захаров тыл эттилэр.
Оттон Иван Винокуров төрөөбүт Арыылааҕын нэһилиэгэр бэлиэ түгэн буолан ааста. Өр сылларга ааттаммакка турбут бөһүөлэк биир киин уулуссатыгар, нэһилиэк дьокутааттарын быһаарыыларынан Иван Винокуров аата иҥэрилиннэ. Үөрүүлээх дьаһалга бөһүөлэк олохтоохторо үөрэ-көтө кыттыыны ыллылар.
Маны таһынан Москва куоракка Чурапчы улууһун делегацията Иван Николаевич Винокуров төрөөбүт күнүн уонна Чурачы улууһа төрүттэммит күнүн бэлиэтии Андрей Сандаминович Федотовка көрсүһүүгэ уонна Иван Николаевич Винокуров уҥуоҕар сибэкки дьөрбөтүн ууруу тэрээһиннэригэр улуустааҕы үөрэх управлениетын салайааччыта Юрий Посельскай итиэннэ оройуон оскуолаларын дириэктэрдэрэ кытыннылар.
Сахатын сиригэр элбэх үтүөнү оҥорбут судаарыстыбаннай диэйэтэл сырдык аата мэлдьи тыыннаах буолуоҕа!
Наталья Сибирякова