Сэтинньи 21 күнүгэр «Айылгы» НАДь-тигэр Чурапчы улууһунааҕы инбэлииттэр уопсастыбаннай тэрилтэлэрин уопсай кэмпириэнсийэтэ буолан ааста. Манна Хоптоҕо, Кытаанах,Төлөй, Болугур, Одьулуун,Хатылы, Алаҕар, Чурапчы нэһилиэктэриттэн талыллыбыт дэлэгээттэр кэлэн көхтөөх кыттыыны ыллылар. мунньахха улуустааҕы социальнай управление инбэлииттэри кытта үлэҕэ отделын исписэлииһэ Надежда Николаевна Дьячковская кытынна, үлэни тэрийиигэ санааларын үллэһиннэ. Өр кэмҥэ улуустааҕы ВОИ бэрэссэдээтэлинэн үлэлээбит Римма Гаврильевна Дьячковская аҕыс сыллаах үлэтин сиһилии отчуоттаата. Отчуоту үчүгэйинэн сыаналаатылар.
Истиҥник саныыр салайааччыбытын бу көрсүһүүгэ сибэкки дьөрбөтүн бэлэхтээн, баҕа санааларбытын тиэрдэн, сынньалаҥҥа атаардыбыт. Кэмпириэнсийэ иккис боппуруоһунан саҥа бэрэссэдээтэли талыы, бырабылыанньа састаабын бигэргэтии буолла. Икки хандьыдаат турбутуттан баһыйар куолаһы ылан, ВОИ саҥа бэрэссэдээтэлинэн Саргылана Николаевна Хоютанова талылынна итини тэҥэ саҥа актыыбы таллыбыт. Кинилэргэ ВОИ курдук киэҥ эйгэни хабар уопсастыбаннай тэрилтэҕэ биир хамаанда буолан, инбэлииттэр интэриэстэрин көмүскүүргэ, туруорсарга ситиһиилээхтик үлэлииллэригэр баҕа санааларын тиэртилэр.
Иннокентий Матвеев, улуустааҕы адаптивнай спорт салайааччыта.