Чурапчыга икки киһи эчэйиилээх улахан суол саахала таҕыста

Бэҕэһээ о.э ахсынньы 28 күнүгэр, киэһэ 21 чаас 47 мүнүүтэҕэ “Халыма” тыраасса 169-с биэрэстэтигэр, икки киһи эчэйиилээх улахан суол саахала таҕыста.

Дьокуускай куораттан Эбээн Бытантайга айаннаан испит “КАМАЗ” массыына, суол кытыытыгар көлүөһэтэ алдьанан турбут “Тойота Эстима” массыынаҕа, анаммыт дистанцияны тутуспакка кэннигэр кэлэн түһэн баран, суолтан көппүттэр. Ол түмүгэр, “Тойота Эстима” массыына суоппара итиэннэ олорсон испит киһитэ ыарахан көрүҥнээх эчэйиилэри ыланнар Чурапчытааҕы киин балыыһа хирургическай отделениетыгар киирдилэр.

Убаастабыллаах суоппардар, дьыбардаах тымныы кэмҥэ оскуорас эрэсиимин булгуччу тутуһаргытын сэрэтэбит, ыраах айаҥҥа турунуох иннинэ тимир көлөҕүт туругун, уотун-күөһүн бэрибиэркэлээн бараҥҥыт биирдэ айанныыргыт ирдэниллэр.

Бу күннэргэ ГАИ сулууспата үлэтин күүһүрдэрин иһитиннэрэр. Уһун өрөбүллэри, бырааһынньык күннэрин этэҥҥэ атаарарга кыһаллыаҕын. Суолга сэрэхтээх буолуоҕун!

Чурапчытааҕы ГАИ сулууспата