Сэтинньи 27 күнүгэр Чурапчы сэлиэнньэтин Александр Федотов аатынан успуорт уораҕайыгар сылын аайы ыытыллар, дьон-сэргэ кыһыҥҥы аһын хаһаанар үгэскэ кубулуйбут “Идэһэ-2024” атыы-эргиэн дьаарбаҥката ыытылларын туһунан Чурапчы улууһун Тыатын хаһаайыстыбатын управлениета иһитиннэрэр.
Сарыарда 10 чаастан саҕалаан успуорт уораҕайын аттынааҕы былаһааккаҕа улууспут тыа хаһаайыстыбатынан дьарыктанар тэрилтэлэрэ, бааһынай, кэтэх хаһаайыстыбалаах дьон бэйэлэрэ оҥорон таһаарбыт бородууксуйаларын: сибиэһэй убаһа, ынах эттэрин, сир аһын эгэлгэтин, ыҥырыа мүөтүн, “Рыба-Ас” оҥорон таһаарбыт аһа-үөлэ, ыыһаммыт эт, халбаһыы уо.д.а ас көрүҥнэрин атыылыахтара.
Чурапчы улууһугар “Ыал саргыта” сыл иитинэн нэһилиэктэр икки ардыларыгар “Дьиэ кэргэн сандалыта” диэн күрэх, ону таһынан оройуоммутугар аан бастакытын “Тортофест” кондитердар куонкурустара тэҥинэн ыытыллара былааннанар.
Итилэри сэргэ көрдөөх куонкурустар эмиэ ыытыллыахтара ол курдук “Аһастаах киһи” моҕустар күрэхтэрэ, “Саамай, саамай, саамай” сүөһү халыҥ хаһатыгар, бөдөҥ собоҕо, минньигэс убаһа этигэр кыайыылаахтары быһаарыахтара.
Даҕатан эттэххэ, эмиэ сарсыарда 10 чаастан Егор Борисов аатынан бибилэтиэкэ-архыыпка “Свое родное” диэн воркшоп буолуоҕа. Оттон эбиэттэн киэһэ 14 частан улуус дьаһалтатын мунньахтыыр саалатыгар улууспут Тыатын хаһаайыстыбатын үлэһиттэрин үөрүүлээх чааска эҕэрдэлээһин сиэрэ-туома ыытыллыаҕа.
Сэмэн ЖЕНДРИНСКЭЙ