Бүгүн сарсыарда 10 чаастан саҕалаан Чурапчы нэһилиэгин Александр Федотов аатынан успуорт уораҕайыгар сылын аайы ыытыллар “Идэһэ-2024” дьаарбаҥка үгүс киһини түмэ тарта.
Манна улууспут тыа хаһаайыстыбатынан дьарыктанар тэрилтэлэрэ, бааһынай, кэтэх хаһаайыстыбалаах дьон бэйэлэрэ оҥорон таһаарбыт бородууксуйаларын: сибиэһэй убаһа, ынах эттэрин, сир аһын эгэлгэтин, ыҥырыа мүөтүн, “Рыба-Ас” оҥорон таһаарбыт аһа-үөлэ, ыыһаммыт эт, халбаһыы уо.д.а ас көрүҥнэрин атыыга таһаардылар.
Үөрүүлээх чааска “Чурапчы улууһа” МО баһылыга Степан Саргыдаев, “Чурапчы нэһилиэгэ” тыа сирин түөлбэтин баһылыга Владимир Сивцев эҕэрдэлээтилэр, наҕараадалары туттардылар.
Чурапчы улууһугар “Ыал саргыта” сыл иитинэн нэһилиэктэр икки ардыларыгар “Дьиэ кэргэн сандалыта” диэн күрэх, ону таһынан оройуоммутугар аан бастакытын “Тортофест” кондитердар куонкурустара тэҥинэн ыытылла тураллар.
Итилэри сэргэ көрдөөх куонкурустар эмиэ саҕаланнылар ол курдук “Аһастаах киһи” моҕустар күрэхтэрэ, “Саамай, саамай, саамай” сүөһү халыҥ хаһатыгар, бөдөҥ собоҕо, минньигэс убаһа этигэр кыайыылаахтары быһаарыахтара.
Манна даҕатан эттэххэ, эмиэ сарсыарда 10 чаастан Егор Борисов аатынан бибилэтиэкэ-архыыпка “Свое родное” диэн воркшоп ыытылла турар. Оттон эбиэттэн киэһэ 14 частан улуус дьаһалтатын мунньахтыыр саалатыгар улууспут Тыатын хаһаайыстыбатын үлэһиттэрин үөрүүлээх чааска эҕэрдэлээһин сиэрэ-туома ыытыллыаҕа.
Сэмэн ЖЕНДРИНСКЭЙ. Ааптар хаартыскаҕа түһэриитэ