Е.А. Борисов аатынан архыып-бибилэтиэкэҕэ биир дойдулаахпыт, аан дойдуга аатырбыт РФ уонна СӨ норуодунай худуоһунньуга Афанасий Мунхалов төрөөбүтэ 90 сылыгар анаммыт “Саха сарсыҥҥылаах санаалара” быыстапка аһылынна.
Быыстапкаҕа ааптар 6 оригинал хартыыналара турдулар.
Бэлиэ түгэҥҥэ улуус дьокутааттарын Сэбиэтин бэрэссэдээтэлэ Яков Оконешников, култуура салалтатыттан Максим Смирников, Афанасий Петрович үөлээннээҕэ Василий Дьячковскай, о.д.а. кыттыыны ыллылар, үтүө тылынан ахтан-санаан аастылар.
“Афанасий Петрович быыстапкалара 26 араас дойдуга оҥоһуллубуттара. Москва саамай сүрүн Третьяковскай галереятыгар, Санкт-Петербурга, Дрездеҥҥэ о.д.а сирдэргэ үлэлэрэ хараллан тураллар. Элбэх үлэтэ бэйэтин дойдутугар биһиэхэ баар. Онон бу улахан нэһилиэстибэнэн, кини хаалларбыт баайынан киэн туттуохтаахпыт, кэнчээри ыччаппытыгар көрдөрөн үөрэтиэхтээхпит.
Афанасий Петрович бэйэтэ оҕо эрдэҕиттэн тулаайах хаалан, Мындаҕаайы детдомугар иитиллэн, Көһөрүллүүнү, олох ыарахаттарын ааспыта. Ол да буоллар, олоххо тардыһыыта күүстээх, талааннаах буолан, бу курдук чулуу худуоһунньук буолан тахсыбытынан бары холобур оҥостуохпутун сөп. Ол да иһин кини үлэлэрэ дириҥ ис хоһоонноохтор, философскай өйдөбүллээхтэр. Үтүөҕэ, кэрэҕэ, сырдыкка эрэ тардыһар хартыыналар буолаллар.
Маннык сүдү үйэлээх үлэлэр умнуллубаттар, күн-дьыл аастаҕын аайы суолталара улаатан иһиэ дии саныыбын”, — диэн архыып-бибилэтиэкэ отделын начаалынньыга Вера Платонова санаатын этэр.
Эбэн эттэххэ, бүгүн СӨ Култуура миниистирэ Афанасий Ноев Афанасий Мунхалов үбүлүөйдээх тэрээһиннэрин ыытарга хамыыһыйаны бигэргэтэр 1-кы №-дээх уурааҕын таһаарда. Кулун тутар ыйга ытыктыыр киһибитигэр аналлаах регионнар икки ардыларынааҕы научнай-практическай кэмпириэнсийэ, о.д.а. дьаһаллар ыытыллаллара былааннанар.
Елена Макаринская