Алтынньы 29 күнүгэр Чурапчы улууһугар Хомсомуол төрөөбүт күнүнэн биир дьоро тэрээһинэ ыытылынна, ол курдук Баартыйа райкомун уонна улуустааҕы бэтэрээннэр Сэбиэттэрин көҕүлээһиннэринэн дьоро тэрээһин ыытылынна диэн социальнай ситимҥэ Клара-Уус Кыыһа суруйар.
Туһумахтаах алааһын «Далбар» балаҕаныгар элбэх киһи тоҕуоруһа муһунна.
Мугудайтан, Одьулуунтан, Алаҕартан, Мындаҕаайыттан, Хатылыттан эдэр саастарын хомосмуолу кытта холбообут, оччотооҕу кэмнэрин олус күндүтүк саныыр хомсомуоллар, баартыйа ыҥырыытын ылынан билигин да инники күөҥҥэ эдэрдии эрчимнэрин ыһыктыбакка, үөрэн-көтөн, сүргэлэрэ көтөҕүллэн, ыраахтан чугастан кэлэннэр кэрэ кэпсээн кэккэлээтэ, ырыа-тойук тардылынна, үҥкүү- битии тэрилиннэ.
Кэлбит хомсомуоллары баартыйа райкомун Чурапчытааҕы сэкирэтээрэ Семен Иванович Никитин, улуустааҕы бэтэрээннэр Сэбиэттэрин бэрэссэдээтэлэ Матрена Николаевна Матвеева эҕэрдэлээтилэр.
1982-1986 сылларга райкомол сэкирэтээринэн үлэлээбит Николай Николаевич Хоютанов эдэр саас төлөннөөх кэмнэрин ахтан-санаан, мустубут хомсомуоллары хайҕаата.
Бу дьоро киэһэни РФ суруналыыстарын Сойууһун чилиэнэ Наталья Гаврильевна Захарова иилээн саҕалаан ыытта. Хас биирдии тыл этэ тахсыбыт киһини хантан сылдьарын, тугу үлэлээбитин-хамсаабытын, билигин бочуоттаах сынньалаҥҥа олорон тугунан дьарыктанарын бэйэтин аймахтарын билиһиннэрэрдии истиҥник сырдатта.
Дьэ ити курдук, бииртэн-биир хомсомуол урукку кэмнэрин умнуллубат түгэннэриттэн ахтан-санаан үгүс тыл этилиннэ, оччотооҕу кэм ырыаларын ыллаатыллар.
Ытык кырдьаҕастарбыт Василий Николаевич Дьячковскай, Спартак Григорьевич Слепцов, Мотрена Ивановна Феофанова эдэр саастарын кэмин долгуйа, астына кэпсээтилэр, кэлбит дьоҥҥо бэйэлэрин алгыстаах тылларын тиэртилэр, ыллаан-туойан, хоһоон ааҕан бу дьоро күҥҥэ бэлэх ууннулар.
Иһийэн турбут балаҕан иһигэр ахтыы, ахтылҕан тыына сатыылаата. Кырдьыга да хомсомуолга уостубат тапталы иҥэрбиттэр, баартыйа ыйбыт сорудаҕын толорорго куруук бэлэмнэрин кинилэр уоттаах-күөстээх тылларыгар истэҕин. Хайдахтаах курдук бу эдэркээн уолаттар, кыргыттар билигин төһө даҕаны ытык, аҕам да саастарыгар олордоллор инникигэ эрэллэрин сүтэрбэккэ, дьаныардаахтык олох туһугар, кэрэ туһугар туруулаһалларын киһи сөҕөр уонна тэҥҥэ үөрэр.
Кэлбит эрэ барыта астынан-дуоһуйан, бу дьоро киэһэни тэрийбит дьоҥҥо истиҥник махтанан, “аныгыс сырыыга көрсүөххэ диэри” дэһэн тарҕастылар.
Бэлэмнээтэ Сэмэн ЖЕНДРИНСКЭЙ