Күрэхтэһии аан дойдутааҕы харахтарынан мөлтөхтүк көрөр дьоҥҥо анаммыт “Үрүҥ торуоска” декада чэрчитинэн ыытыллар. Чурапчы сиригэр-уотугар ыаллыы сытар Таатта, Мэҥэ Хаҥалас, Амма улуустарын хамаандалара күрэхтэһэ кэллилэр.
Чурапчы улууһун адаптивнай спорт көрүҥүн бэрэссэдээтэлэ Иннокентий Матвеев: “Дойдубут үрдүнэн адаптивнай спорт кэнники сылларга сайдан, кэҥээн иһэр. Бу күннэргэ харахтарынан мөлтөх дьоҥҥо аналлаах “Үрүҥ торуоска” декада ыытылла турар. Ол чэрчитинэн, Чурапчы улууһун дьаһалтата, улуустааҕы спорт салалтата уонна адаптивнай спорт федерацията сүбэлэһэн, илин эҥэргэ бастакынан “Илин эҥэр кубогын иһин” күрэҕи тэрийдибит. Кубокпыт көһө сылдьар буолуоҕа. Биһигиттэн саҕалаан, атыттар эмиэ үгэскэ кубулутан, батыһан иһиэхтэрэ диэн эрэнэбит. Спортсменнар дьарыктара үчүгэй. Өрөспүүбүлүкэтээҕи адаптивнай киин салалтата бэйэтинэн өйөөн, судействоҕа уонна тэрийиигэ дьону ыытта, ону таһынан голбол экипировкатын, спортивнай инвентарын бэлэх ууннулар. Улуустааҕы адаптивнай спорт федерациятын “Дьулуур” ХЭТ салайааччыта Сергей Федоров салайар. Кини биһиэхэ сүрдээх элбэх көмөнү оҥорор. Бүгүҥҥү күрэххэ 9 м уһуннаах тимир каркаастаах воротаны оҥорон бэлэхтээтэ. Онон голбол көрүҥүн да, адаптивнай спорду да сайыннарыыга биһиги улууска элбэх үлэ ыытыллар», — диэн кэпсиир.
Күрэхтэһии үөрүүлээх аһыллыытыгар Чурапчы улууһун дьаһалтатын социальнай коммуникациялар отделын салайааччыта Алена Пермякова, Чурапчы нэһилиэгин дьаһалтатын социальнай боппуруостарга исписэлииһэ Мария Матвеева кэлэн эҕэрдэ тылларын эттилэр, адаптивнай спорт сайдыытыгар кылааттарын киллэрсэр биир дойдулаахтарбытыгар наҕараадалары туттардылар.
Елена Макаринская