СӨ Наука Академиятын төрөөбүт тылы сайыннарыы, харыстааһын уонна үөрэтии киинин салайааччыта Феодосия Габышева бүгүн Чурапчыга үлэлиир.
С.А. Новгородов аатынан Чурапчы орто оскуолатыгар улуус оскуолаларын дириэктэрдэрин, уһуйааннар сэбиэдиссэйдэрин кытта көрсөн, Үөрэх миниистирин Ньургууна Соколова аатыттан Илин эҥэргэ үөрэх форумун тэрийэн үлэлиэҕиҥ диэн этиини киллэрдэ.
Кини: «Биэс улуус: Чурапчы, Мэҥэ Хаҥалас, Амма, Таатта, Уус Алдан биир социальнай-экономическай зонаҕа баалларынан сибээстээн, бары кыттыһан, ханнык улууска ханнык күүстээх хайысха баарын көрөн, ону тутуһан, бары биирдик үлэлиэҕиҥ, оччоҕо таһым үрдүүрүн, сайдыы түргэтиирин ситиһиэхпит», — диэн эттэ. Маны таһынан Чурапчы улууһа урут уруккуттан ырааҕы, киэҥи көрөн, саҥаны киллэриигэ бастакы хардыылары оҥорорун бэлиэтээтэ. Ол курдук, аан бастакынан Чурапчы улууһугар агрооскуола уонна үрдүк үөрэх кыһата тэриллибитин, о.д.а. хайысхалаах үлэлэр барбыттарын холобурдаата. Онон үөрэх форумун тэрийиигэ чурапчылар көмөлөрө улахан буолуоҕар эрэнэрин биллэрдэ.
Мунньахха улуус баһылыга Степан Саргыдаев, баһылыгы социальнай боппуруостарга солбуйааччы Мария Кронникова, үҕрэх салалтатын начаалынньыга Юрий Посельскай кыттыыны ыллылар. Юрий Посельскай үөрэх эйгэтигэр ситиһиилэри, көрдөрүүлэри кэпсээтэ.
Эбиэт кэнниттэн Феодосия Габышева улуус баһылыга Степан Саргыдаев кыттыылаах төгүрүк остуолга кыттыаҕа, «Улыбка» уһуйааҥҥа сылдьыаҕа.
Елена Макаринская