Балаҕан ыйын 15-18 күннэригэр “Илии сылааһа” иис сыаҕын тэрийиитинэн, СӨ Бырабыытылыстыбатын өйөбүлүнэн, анал байыаннай дьайыыга сылдьар биир дойдулаахтарбытыгар анаан «Эр хоһуун» таҥас кэмпилиэгин тигэр иистэнньэҥнэр куонкурустара буолла.
Куонкурус үөрүүлээх арыллыыта социальнай ситим нөҥүө ыытыллыбыта. Куонкурус кыттыылаахтарын эҕэрдэлээн СӨ Бырабыыталыстыбатын бэрэссэдээтэлин солбуйааччы Дмитрий Садовников, куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков уо.д.а. тыл эппиттэрэ. “Илии сылааһа” иис сыаҕын салайааччы, “Гражданскай килбиэн” бэлиэ хаһаайына Ирина Саввина куонкурус туохха олоҕуран ыытылларын туһунан сырдаппыта, балаһыанньаны билиһиннэрэн, ситиһиилэри баҕарбыта.
Чурапчы улууһун дьахталларын түмсүүтэ уонна “Арассыыйа ийэлэрэ” хамсааһын улуустааҕы салаата бу аахсыйаҕа кыттыһан, таҥастары тиктилэр. Хамаанда салайааччыта, биллэр иистэнньэҥ Надежда Ахматова бу туһунан санаатын маннык үллэһиннэ: “Тигиэхтээх матырыйаалбытын тиксэрбиттэрэ. Хамаандабытыгар сэттиэбит. Улууспут биллэр-көстөр иистэнньэҥнэрэ, анал чааһынай урбаанньыттар кытталлар. Уопсайа, 7 кэмпилиэк таҥаһы тигэн Дьокуускайга тиксэриэхтээхпит. Үлэбит түмүгүн сыаналаан, анал номинациялар олохтоммуттар. Онон бииргэ үлэлиир хамаандабар ситиһиилэри баҕарабын. Байыаннай дьайыыга сылдьар уолаттарбытыгар итии таҥастары тигэн, бэйэбит сэмэй кылааппытын киллэрсэбит. Этэҥҥэ дойдуларыгар бары эргиллэллэригэр баҕарабыт.”
Куонкуруска кыттар Таатта, Чурапчы, Томпо, Амма, Мэҥэ Хаҥалас, Хаҥалас, Нам, Кэбээйи, Өлөөн, Абый улуустарын, Жатай бөһүөлэгин хамаандалара түөрт күн устата барыта 13 устуука, 10 көрүҥ таҥаһы тиктилэр. Бэҕэһээ, ол эбэтэр балаҕан ыйын 18 күнүгэр, киэһэ 18:00 чааска куонкурус түмүктэннэ, үлэлэр тэрийээччилэргэ туттарыллыахтара. Кыайыылаахтар балаҕан ыйын 23 күнүгэр, үлэ хаачыстыбатынан быһаарыллыахтара.
Ийэлэр илиилэрин сылааһынан угуттанан, алгыс тылынан арыалланан тигиллибит таҥастар, уолаттарбытыгар харысхал, дурда-хахха буоллуннар!
Сэмэн Жендринскэй