Бүгүн Е.А.Борисов аатынан улуустааҕы киин бибилэтиэкэ-архыыпка Иннокентий Левин — Ньээчис «Эһиэхэ аныыбын күн уотун» кинигэтин сүрэхтэниитэ буолла. Кэбээйиттэн төрүттээх, кэлин кэргэннэнэн, дьиэ-уот тэринэн Чурапчыга олорбут Иннокентий Наумович саха литэрэтиирэтигэр биир биллэр-көстөр суолу хаалларбыт суруйааччыбыт буолар. Кини аймаҕа, балта Альбина Петрова талааннаах бэйиэт, прозаик, кириитик суруйан хаалларбыт рукописьтарын бүтүннүүтүн хомуйан, биири да көтүппэккэ кичэйэн туран көмпүүтэргэ киллэрэн, эрэдээктэрдээн бу кинигэ быйыл күн сирин көрдөҕө.
Үөрүүлээх тэрээһиҥҥэ Кэбээйи улууһуттан 10-тан тахса киһилээх дэлэгээссийэ, ол иһигэр Иннкентий Левин аймахтара, кинигэ эрэдээктэрэ Альбина Васильевна кэлэн кыттыыны ыллылар. Бу кинигэ хайдах уурбут-туппут курдук эриэккэс чэпчэкитик таҥыллыбытын, барыта орун оннугар табыллан тахсыбытын Альбина Петрова олус интэриэһинэйдик кэпсээтэ. Эҕэрдэ тылларын Кэбээйи улууһун баһылыгын эбээһинэһин толорооччу, Чурапчыттан төрүттээх бэйэбит ыччаппыт Александр Сивцев, Чурапчы улууһун баһылыгын социальнай боппуруостарга солбуйааччыта Мария Кронникова эттилэр, хардарыта Махтал суруктары, бэлэхтэри туттардылар. Бары киэн туттар норуодунай суруйааччыбыт, Иннокентий Левин доҕоро, үөлээннээҕэ С.А.Попов-Сэмэн Тумат олус истиҥник доҕорун ахтан-санаан ааста, талааннаах киһини өйүүр-өйдүүр мындыр толкуйдаах аймах-билэ дьоно баар эрэ буоллаҕына кини аата, үлэтэ үйэтитиллэр, өр сылларга хаалар диэн тоһоҕолоон туран Альбина Васильевнаҕа махтал тылларын анаата.
Наталья Сибирякова, ааптар видеоҕа устуута