Ахсынньы 7-8 куннэригэр Чурапчы улууһугар велосипеды таптааччылар, велоклубтар сылы түмүктүүр уонна «Дьулуур» велоклуб 5 сыллаах үбүлүөйүн бэлиэтиир тэрээһин буолан ааста.
Кэлбит ыалдьыттары Д.Д. Красильников аатынан Мугудай орто оскуолатын үөрэнээччилэрэ, кэлэктиип көрүстэ. Оскуола иһинэн үлэлиир баай экспонаттаах музейы «Сомоҕо» оҕо түмсүүтүн салайааччы педагога С.С. Мыреев көрдөрдө, кэпсээтэ.
Үөрэнээччилэри кытта көрсүһүүгэ 1998 с. велотуризмынан утумнаахтык дьарыктанар, куораттан ВелОСА кулууп чилиэнэ Ангелина Петрова быйылгы сыллааҕы Дьокуускай — Мииринэй хайысханан велопоходтарын кэпсээтэ. Бу хайысхаҕа ордук ханнык суол балаһатыгар ыарырҕаппыттарын, суолга кутталлаах адьырҕалары көрсүөхтэрин сөбүн, тыраамбаламмат гына туох ирдэнэрин барытын сиһилии кэпсээтэ, оҕолор боппуруостарыгар эппиэттээтэ, сүбэ-ама биэрдэ.
Салгыы Чурапчыга айаннаатыбыт. Чурапчытааҕы А.К. Софронов аатынан КСК саахымат — дуобат хоһугар төгүрүк остуол ыытылынна. Төгүрүк остуолу СӨ физкултуура уонна спорт үтүөлээх үлэһитэ Надежда Максимова ыытта. Ангелина Петрованы Чурапчы улууһун Бочуотунай грамотатынан бэлиэтээтилэр. Бэтэрээн сүүрүктэрбит, сүүрүүгэ, марафоҥҥа көтүппэккэ кыттар эдэрдэрбит улуустааҕы спортотдел эҕэрдэ суругунан бэлиэтэннилэр. 5 сыл тухары араас велопробегтарга кыттыбыт , кытта сылдьар дьоммутугар улуустааҕы үөрэх салалтатын идэлээх сойуустарын бэрэссэдээтэлэ Егор Давыдов илии баттааһыннаах эҕэрдэ суругун, бэлэҕин туттулар.
Төгүрүк остуолга инники былааннары оҥостууга киэҥ сүбэлэһии буолла. Өрөспүүбүлүкэ велосипедистарын түмэргэ туох үлэ барыан сөбүн, ханнык күрэхтэһиилэр ыытыллыахтарын, оскуола оҕолоругар өйдөтүү бэсиэдэлэри ыытыы боппуруоһа ырытылынна.
Улуу тренербит Д.П. Коркин музейыгар сырытыннаран, «Далбар» балаҕан сылаас астаах сандалытын тула ирэ-хоро кэпсэттибит. Үбүлүөйбүтүнэн хаартысканан кинигэ онотторон, бэлиэ хаартыскаларбыт киирэн, үөрүүбүт үксээтэ.
Иккис күҥҥэ «Чэбдик» кулууп ыҥырыытынан, ойбоҥҥо киирэллэрин, сэрээккэлэрин көрдүбүт.
«НамВел» кулууп чилиэнэ Хомустаах Сөдүөт хорсуннук ойбоҥҥо киирэн таҕыста.
Тэрээһиммит үтүө түмүктэрдээх, инникигэ элбэҕи эрэннэрэр сыаллаах түмүктэннэ.
Ким баҕалаах, тимир көлөнү аргыс оҥостубут эдэр да, эмэн да дьону биһиги кэккэбитигэр киириҥ диэн ынырабыт.
Пермякова Анна, велоклуб салайааччыта