Чурапчыга доруобайыларынан хааччахтаах дьоҥҥо анаммыт Саңа дьыллааҕы баал ыытылынна. Быйылгы тэрээһини Одьулууннааҕы Т.Г. Тоскин аатынан «Сайдыс» НАДЬ уонна «Оптимист» (Барашкова Е. Я.) доруобайыларынан хааччахтаах дьон түмсүүтэ ыытта.
Чурапчы улууһун спорт управлениетын начаалынньыга Дьулустан Егоров мустубут дьону Саҥа үүммүт сылынан эҕэрдэлээтэ уонна спорт өрөспүүбүлүкэҕэ тэриллибитэ 100 сылыгар анаммыт үбүлүөйдээх бэлиэни спорт бэтэрээннэригэр Т. И. Дьяконоваҕа, М.А.Дьячковскаяҕа, улуус наҕараадаларын уопсастыбаннай үлэҕэ көхтөөхтүк кыттар дьоҥҥо, ГТО үрдүкү мэтээлин ЧГФКСИ устудьуонугар Иван Хоютановка туттарда.
Улуустааҕы инбэлииттэр уопсастыбаларын бэрэссэдээтэлэ Саргылана Хоютанова, адаптивнай спорт салайааччыта Иннокентий Матвеев, Одьулуун нэһилиэгин баһылыга Людмила Ефремова истиҥник эҕэрдэлээн туран, ааспыт сыл түмүктэрин сырдаттылар, быйылгы сылга туох өрүттээх үлэ-хамнас , тэрээһиннэр ыытыллыахтаахтарын, соруктары билиһиннэрдилэр.
Саҥа дьыллааҕы баалга улуус 7 нэһилиэгиттэн кэлэн, «Саҥа Дьыллааҕы сандалым» -остуол киэргэтиитигэр, араас артыыстары пародиялаан көрдөрүүгэ, маскараат күрэҕэр көхтөөхтүк кытыннылар, үүммүт сылга үлэ бары хайысхаларыгар өссө үрдүк кирбиилэри ситиһэргэ сыал-сорук ылыннылар, дуоһуйа сынньанан, сэргэхсийэн тарҕастылар.
Саргылана Хоютанова.
