Урут тиһигин быспакка ыытыллар тэрээһин, кэнники сылларга биллэр биричиинэнэн тохтоон баран, быйыл дьэ «Айылгы» норуот айымньытын дьиэтигэр саҥалыы тыынынан буолла. Аҕам саастаахтарбыт бука бары сүргэлэрэ көтөҕүллэн, үөрэн-көтөн туран киэҥ сааланы толору тоҕуоруһа муһуннулар.
Дьоро киэһэ үөрүүлээх чааһыгар Чурапчы улууһун дьокутааттарын сэбиэтин бэрэссэдээтэлэ Яков Оконешников, улуус баһылыгын социальнай боппуруостарга солбуйааччы Мария Кронникова, улуустааҕы бэтэрээннэр сэбиэттэрин салайааччыта Мотрена Матвеева эҕэрдэ тылларын эттилэр, актыыбынай позициялаах, улуус араас эйгэҕэ сайдыытыгар туохха да тэҥнэммэт кылааттарын киллэрэ сылдьар ытык дьоммутугар наҕараадалары туттардылар. Маны тэҥэ бэтэрээннэри, аҕам саастаахтары кытары ыкса үлэлэһэр тэрилтэлэр — пенсионнай социальнай фонда; сокуоннай саастарын ситэ илик оҕолору чөлүгэр түһэрии киинин иитинэн ааспыт сылга аһыллыбыт Дьиэ кэргэҥҥэ элбэх өҥөнү оҥорор киин (кинилэр үлэлэрин биир хайысхатынан аҕам саастаахтарга аналлаах «Силис» диэн түмсүү тэриллибитэ) итиэннэ улуустааҕы култуура управлениета эмиэ иһирэх эҕэрдэлэрин этэн туран Махтал суруктары, бэлэхтэри туттардылар.
Биллэн турар, бэтэрээннэр сэбиэттэрин үлэтигэр-хамнаһыгар нэһилиэктэр бүттүүн сүҥкэн оруолу ылаллар. Хас биирдии нэһилиэккэ аҕам саастаахтар түмсүүлэрэ таһаарыылаахтык, актыыбынайдык үлэлииллэр, улуус уопсастыбаннай олоҕор көхтөөхтүк кытталлар. Бу үлэни-хамнаһы сыаналаан, 2024 сыл түмүгүнэн бастыҥ үлэлээхтэрин бэлиэтээн туран, үһүс миэстэҕэ Кытаанах, иккискэ — Болтоҥо уонна бастакы миэстэҕэ Одьулуун нэһилиэгин тыа сирин түөлбэлэрэ тахсан, үөрүүлэрэ өссө үрдээтэ. Кыайыылаахтар харчылаах сэртипикээттэри туттулар.
Наталья Сибирякова, ааптар хаартыскаҕа түһэриитэ, видеоҕа устуута