Чурапчыга Аан дойдутааҕы Дьиэ кэргэн күнүнэн, улуустааҕы «Ыал саргыта» пилотнай бырагыраама иһинэн эдэр уонна элбэх оҕолоох ийэлэри чиэстээтилэр.
Элбэх функциялаах дьиэ кэргэн киинигэр мустубут дьону-сэргэни улуус дьаһалтатын социальнай хайысхаҕа отдел исписэлииһэ Алена Пермякова, Чурапчы улууһун социальнай харалта управлениетын салайааччыта Лидия Тосукаева Дьиэ кэргэн декадатынан эҕэрдэлээн туран, дьиэ кэргэттэргэ судаарыстыба, өрөспүүбүлүкэ өттүттэн араас хабааннаах көмөлөр оҥоһуллалларын бэлиэтээтилэр.
«Арассыыйа Бэрэсидьиэнэ Владимир Путин этиитинэн, элбэх оҕолоох дьиэ кэргэн статуһун үрдэтиигэ саҥа сокуон көрүллэ сылдьар. Бу ылылыннаҕына туһааннаах дастабырыанньа болдьоҕо суох буолуоҕа. Билигин Саха сиригэр оҕо 23 сааһыгар диэри очнай үөрэнэр буоллаҕына, дьиэ кэргэн элбэх оҕолоох статуһа сотуллубат. Саҥа дьаһал олоххо киирэригэр эрэнэбин», — диэтэ Лидия Васильевна.
Дьиэ кэргэҥҥэ анаммыт үөрүүлээх тэрээһиҥҥэ элбэх оҕолоох дьиэ кэргэн статуһун туоһулуур дастабырыанньалары Анастасия Поповаҕа, Анна Луковцеваҕа, өрөспүүбүлүкэтээҕи Ийэ хапытаал сэртипикээтин Ульяна Петроваҕа, ону таһынан бастакы оҕолорун оҕоломмут (иитэ ылбыт) ийэлэргэ улуустан 50 тыһыынча суумалаах сэртипикээттэри туттардылар.
Марфа Петрова.