Чурапчыга «Дьиэ кэргэн дьолун ырысыаба» видео-куонкурус ыытылынна

Арассыыйаҕа Дьиэ кэргэн, өрөспүүбүлүкэҕэ Оҕо саас, улууска Ыал саргытын сылларын чэрчитинэн улуустааҕы «Дьиэ кэргэн дьолун ырысыаба» диэн Чурапчы улууһун иитэр ыалларын икки ардыларыгар видео-куонкурус ыытылынна. Бу сонун тэрээһини Эпиэкэ уонна попечительство отдела тэрийдэ. Күрэх сүрүн сыалынан дьиэ кэргэн үгэстэрин бөҕөргөтүү, оҕону иитии уопуту тарҕатыы, улахан дьон уонна оҕо сыһыанын тупсарыы буолар.

Барыта 6 ыал 8 видеоролигынан кытынна. Ол курдук, кыттааччылар сөбүлээн астыыр бүлүүдэлэрин хайдах буһаралларын-оҥороллорун видеоҕа устан, кистэлэҥнэрин үллэһиннилэр. Киирбит үлэлэри дьүүллүүр сүбэ хас да критерийинэн сыаналаата: теманы арыйыы, уратытын көрүү, дьиэ кэргэн бары кыттыыны ылыыта, уус-уран уонна үлэ хаачыстыбата.

Куонкурус түмүгүнэн кыайыылаахтарынан буоллулар:

I миэстэ – Сылаҥ нэһилиэгин Бэрэ учаастагын олохтооҕо Евдокия Артемьевна Софронова уонна кини сиэнэ, Бэрэ алын сүһүөх оскуола-саадын 2-с кылааһын үөрэнээччитэ Маша Тимофеева.

II миэстэ – Хадаар нэһилиэгин олохтооҕо Евдокия Егоровна Протодьяконова уонна кини сиэнэ Хадаар орто оскуолатын 10-c кылааһын үөрэнээччитэ Люба Сергеева.

III миэстэ – Чурапчы нэһилиэгин олохтооҕо Байаана Егоровна Чичигинарова уонна кини быраата, С.А. Новгородов аатынан Чурапчы орто оскуолатын 9-c кылааһын үөрэнээччитэ Костя Максимов.

Кыайыылаахтар дипломунан уонна сертификатынан наҕараадаланнылар. Бары кыттааччыларга ситиһиилэри баҕарабыт.

Улуустааҕы эпиэкэ отдела.