Тохсунньу 31 күнүгэр Чурапчы сэлиэнньэтигэр А. И.Федотов аатынан спорт киинигэр ССРС спордун маастара, ССРС эдэрдэргэ чемпиона, Саха Өрөспүүбүлүкэтин Н.Н.Тарскай бирииһин икки төгүллээх чемпиона, элбэх турнирдар Кыайыылаахтара, Саха Өрөспүүбүлүкэтин физическэй култуураҕа уонна спортка Үтүөлээх үлэһитэ, Россия физическэй култуураҕа уонна спортка туйгуна, Чурапчы улууһун, Арыылаах нэһилиэгин Бочуоттаах гражданиннара Семён Семёнович Морфунов үбүлүөйдээх 75 сааһыгар анаммыт бырааттыы Морфуновтар бириистэригэр көҥүл тустууга өрөспүүбүлүкэ аһаҕас турнирга ыытылынна.
Турнирга Дьокуускай куораттан, өрөспүүбүлүкэ улуустарыттан барыта 59 бөҕөс күөн көрүстэ. Бу кэмҥэ өрөспүүбүлүкэбит бастыҥ көрдөрүүлээх тустууктара, ол иһигэр соторутааҕыта буолбут Иван Ярыгин турнирын кыттыылаахтара туһуннулар. Александр Авелов, Артем Слепцов, Любомир Ашеин, Олег Фомин, Андрей Мидловец, Федор Постников, Егор Явловскай о.д.а. көбүөргэ тахсыылара көрөөччүлэри сэргэхситтэ.
Турниры үөрүүлээхтик аһыыга улуус баһылыга Степан Саргыдаев, улуус мунньаҕын председателэ Яков Оконешников, кырдьаҕастар сэбиэттэрин председателэ Герасим Платонов, ЧГИФКСИ ректора Иннокентий Готовцев, Арыылаах нэһилиэгин дьаһалтата, нэһилиэк баһылыктара, о. д. а. эҕэрдэ тыл эттилэр. Кинилэр бырааттыы Морфуновтар спортка ситиһиилэрин киэн тутта аҕыннылар, Семён Семенович спортка, үлэгэ инники сылдьарыттан үөрэллэрин, астыналларын биллэрдилэр. Кинини ,,Улуус Сайдыытыгар үтүөлэрин иһин» бастакы степеннээх, ,,Бочуоттаах ветеран» бэлиэлэринэн наҕараадалааһыны ытыс тыаһынан доҕуһуоллаатылар.
Иван Ярыгин турнирын үрүҥ көмүс призера Константин Капрыновы чиэстээһин буолла. Чурапчы чулуу тустуугар, тренеригэр Егор Пономаревка ситиһиини баҕардылар.
Турнир кыайыылаахтарынан, призердарынан буоллулар:
61 кг диэри ыйаасыннаахтарга Фёдор Постников, Любомир Ашеин, Егор Явловскай, Артём Слепцов.
65 кг диэри:
Александр Авелов,
Эдуард Попов, Николай Заболоцкай, Манчаары Ильинов.
70 кг диэри:
Игорь Матвеев, Владислав Кривошапкин, Иннокентий Антонов, Пётр Ксенофонтов.
74 кг диэри:
Олег Фомин, Николай Захаров, Ньургун Степанов, Давид Чириков.
Кыайыылаахтарга наҕараадалар, бириистэр туттарылыннылар.
Алексей Слепцов
.