Быйыл, тоҕус томтордоох Чурапчыга 2014 сылтан ыытыллар “Үтүө санаа харыйата” аһымал аахсыйаҕа Чурапчы улууһун бойобуой дьайыы бэтэрээннэрин уопсастыбаннай түмсүүтэ онус төгүлүн көхтөөх кыттыыны ылар.
- Улууспутугар, нэһилиэкпит иһинэн элбэх үлэлэр ыытыллаллар. Биһиэхэ, бойобуой дьайыы бэтэрээннэригэр саамай кылаабынайа – оҕолорбут, ыччаттарбыт үөрбүт-көппүт сирэйдэрэ, чэгиэн-чэбдик доруобуйалара буолар. Ханнык баҕарар оҕо үүнэр Саҥа дьылга баҕа санаата хайаан даҕаны туолуохтаах, ол инниттэн биһиги түмсүүбүт уолаттара бэйэлэрин баҕа өттүлэринэн кыттыһаннар Алаҕар нэһилиэгэн Гавриил Протодьяконов аатынан орто оскуола 4 кылааһын үөрэнээччитэ Аиза Оконешникова баҕа санаатын толордубут, — диэн бойобуой дьайыы бэтэрээнэ Василий Владимирович Монастырев эттэ.
Бойобуой дьайыы бэтэрээннэрин түмсүүтэ улууска ыччаты патриотическай өйгө-санааҕа иитиигэ биир бастакынан күүстээх үлэни ыытар, ол курдук байыаннай дьайыыга ону таһынан эйэлээх олоххо төннөн кэлэн баран суорума суолламмыт бойобуой доҕотторун ааттарын үйэтитиигэ “Саллаат паартата” аахсыйа тэриллэн улууспут оскуолаларыгар туруорулуннулар. Уолаттар улааппыт, олорон ааспыт алаһа дьиэлэригэр мемориальнай дуоскалар ыйаннылар. Улууска ыытыллар туох баар бары дьаһалларга туора турбакка кыттыыны ылаллар, үөрэнээччилэргэ, устудьуоннарга туһааннаах кылаас чаастара ыытыллаллар.
Амарах сүрэхтээх бэтэрээннэр былырыыҥҥыттан саҕалаан ыраах Алаҕар нэһилиэгэр олорор Аиза Оконешникова болҕомтолорун уураннар төһө кыайарынан көмөлөһө сатыыллар, ол курдук уолаттар бу күһүн кырачаан үөрэнээччи оскуолаҕа барарыгар толору тэрийбиттэрэ онтон бүгүн Аиза саамай улахан ыра санаатын бэлэх оҥордулар. Онно кырачаан кыыс оскуола харыйатыгар бырааһынньыктыы барарыгар анаан кыраһыабай быһыылаах киэһээҥҥи былааччыйата, кыргыттарга аналлаах өйү сайыннарар “Лего” конструктор ону таһынан ичигэс, олус тупсаҕай кыһыҥҥы сон уонна тыалтан, тымныыттан чаҕыйбат кыһыҥҥы ыстаан.
“Оҕолор билигин даҕаны дьикти баарыгар итэҕэйэллэрэ уонна эрэнэллэрэ киһини улаханнык үөрдэр. Урут биһиги саҕана биир дьаабылака сыта күндү курдук буолара. Аиза оҕо сааһа хайаан даҕаны дьоллоох буоллун, кыыс киһи ыра санаата хайаан даҕаны туолуохтаах. Саҥа дьыл диэн алыптаах кэм, баҕа санаа туолуута буоллаҕа”, — диэн Афганистан сэриитин бэтэрээнэ Савелий Иванович Дьячковскай санаатын үллэһиннэ. Үөрүүлээх түгэҥҥэ бойобуой дьайыы бэтэрээннэрэ Олег Оконешников, Иннокентий Прокопьев кыттыыны ыллылар.
“Биһиги дьиэ кэргэн аатыттан эһиэхэ бука барыгытыгар улаханнык махтанабыт. Оҕом баҕа санаата туолла, наһаа өр кэтэспитэ. Саҥа дьыл эһиэхэ элбэх үөрүүлээх түгэннэри, сылаас, истиҥ сыһыаны аҕаллын, дьон-сэргэ махталын ыла туруҥ. Аиза саҥа таҥаһын сарсыҥҥыттан оскуолатыгар кэтэн барыах буолла, бэйэтэ ырыа, үҥкүү куруһуогар дьарыктанар”, — диэн Аиза ийэтэ Ольга Николаевна махталын биллэрдэ.
Сэмэн Жендринскэй, Чурапчы улууһун бойобуой дьайыы бэтэрээннэрин Сэбиэтин бэрэссэдээтэлэ . Ааптар хаартыскаҕа түһэриитэ