Чурапчы улууһун баһылыга Степан Саргыдаев, бойобуой дьайыы бэтэрээннэрин бука барыларын, дойду дьонун киэн туттуутунан итиэннэ байыаннай чаастар элиталарынан сыаналаата.
Бэҕэһээ о.э. ахсынньы 9 күнүгэр, оройуоннааҕы “Айылгы” НАДь-гэр “Чурапчы улууһа” МО баһылыга Степан Саргыдаев уонна улуус дьокутааттарын Сэбиэтин бэрэссэдээтэлэ Яков Оконешников, артиллерист Гавриил Протодьяконов аатынан түөскэ анньыллар мэтээллэри, кыргыһыы хонуутугар олохторун харыстаабакка эрэ хорсуннук сулууспалыы сылдьар уолаттарга, анал байыаннай дьайыы кыттыылаахтарыгар туттардылар.
“Аҕа дойдуну көмүскүүр модун санаалаах дьоруойдары иитэн таһаарыы Ийэ дойдуга сүҥкэн суолталааҕын бүгүн биһиги хаһааҥҥытааҕар даҕаны өйдүүбүт.
Ийэ дойдуга суостаах-суодаллаах күннэр тирээтэхтэринэ Саха сирин олохтоохторо хаһан да туора турбат этилэр. Билиҥҥи көлүөнэ Аҕа дойду көмүскэлигэр инники кэккэҕэ киирэртэн чаҕыйбат, Ийэ дойдуга бэриниилээх дьон буолан иитиллэн тахсарынан мин киэн туттабын.
Хас биирдии дьиэ кэргэн үйэлээх үгэһи тутуһар. Ол быһыытынан, бүгүн биһиги бары, биир дьиэ кэргэн курдук, Улуу Кыайыыны аҕалсыбыт Аҕа дойду Улуу сэриитин кыттыылаахтарын дьоруойдуу быһыыларыгар сүгүрүйэбит.
Ытыктыыр бэтэрээннэрбит хорсун быһыылара, эр санааланыылара халбаҥнаабат хоодуот буолуу холобурдарын Арассыыйа бүгүҥҥү көлүөнэ дьонугар көрдөрөллөр. Аҕа дойду Улуу сэриитигэр биэс сыл устата хааннаах кыргыһыыларга санааҕытын түһэрбэккэ, уустук кэмнэри туораан кыайыыны уһансыбыккыт. Сэрии кэнниттэн эйэлээх олоҕу түстэһэргэ эр санааланыы тыыннаах холобурунан буолбуккут, буойуннуу бэриниилээхтик үлэлээбиккит.
Хомойуох иһин, Сир үрдүгэр фашизм эмиэ үөскээн эрэр. Аҕаларбыт, эһээлэрбит суолларын батыһан, Арассыыйа билиҥҥи көлүөнэтэ нацизмы утары хорсуннук туруулаһыа диэн эрэнэбин.
Анал байыаннай эпэрээссийэ бойобуой сорудаҕын толоро сылдьар Арассыыйа бары гражданнара, ол иһигэр биһиги биир дойдулаахтарбыт – Аҕа дойду бүгүҥҥү Дьоруойдара. Кинилэр – каадырабай байыаннайдар, хантараагынан, мобилизациянан барбыттар уонна баҕа өттүнэн барбыт Ийэ дойдуларыгар дьиҥ чахчы бэриниилээх дьоммут – элбэх омуктаах дойдубутугар көҥүл уонна эйэ туругурарын, хас биирдиибит эйэлээх олоххо олорорбут туһугар туруулаһаллар. Биһиги өрөспүүбүлүкэбит дьоруойдарбытын өйөөн, эбии тэрилинэн, малынан, аһынан-үөлүнэн хааччыйар, бырабыыталыстыбабыт, муниципальнай тэриллиилэрбит байыаннай сулууспалаахтарбыт дьиэ кэргэттэрин өйүүллэр. Чурапчы улууһун олохтоохторо эмиэ бэйэлэрин баҕаларынан буойуттар оҕолоругар, кэргэттэригэр, төрөппүттэригэр көмөлөһөллөрө махталлаах. Дьоруойдары иитэн таһаарбыт төрөппүттэргэ, кинилэр дьиэ кэргэттэригэр уонна оҕолоругар чиэс уонна ытыктабыл буолуохтун! Аҕа дойдубут бүгүҥҥү Дьоруойдарын – эр санаалаах эһээлэрбитин, хорсун-хоодуот аҕаларбытын, уолаттарбытын, убайдарбытын, бырааттарбытын – бука барыгытын дьиэҕитигэр кыайыы көтөллөөх эргиллэргитин эрэнэ күүтэбит!
Аҕа дойду Дьоруойдарын күнүнэн бүгүн дьоруойдарбытын уруйдуубут-айхаллыыбыт. Хомойуох иһин, биһиги ортобутугар суох дьоруойдарбытын ахтан-санаан ааһар – ытык иэспит. Кинилэри кэриэстээн дойдубут, өрөспүүбүлүкэбит устуоруйатыгар кыһыл көмүс буукубаларынан суруллубут сырдык ааттарын оскуолаларга, уулуссаларга иҥэрэн, олорбут олохторун холобур оҥостон ыччаттарбытыгар тиэрдиэхпит! Аҕа дойду Дьоруойдарыгар – үйэлэргэ умнуллубат Албан Аат!” – диэн Степан Анатольевич бэйэтин этиитигэр бэлиэтээтэ.
Улуус баһылыга кинилэри сэргэ оройуоммут чиэһин байыаннай-патриотическай оонньууларга өрөспүүбүлүкэ, дойду таһымнаах куонкурустарга көмүскээбит эдэр армеецтары Феликс Поморцев аатынан мэтээллэринэн наҕараадалаата.
Итини таһынан Сталинград сэриитин Дьоруойа Гавриил Прпотодьяконовка аналлаах пааматынньыгы туруорууга үп хомуурун аахсыйата кэлэр сыл кулун тутар ыйыгар диэри ыытылларын, Улуу Кыайыы 80 сылын көрсөр дьаһаллар саҕаламмыттарынан туһунан иһитиннэрдилэр.
Сэмэн ЖЕНДРИНСКЭЙ