Кэлэр нэдиэлэҕэ Чурапчы улууһугар, эмиэ буоларын курдук, сонун тэрээһин ыытыллара былааннанар. Ол курдук, билиҥҥи кэм саха худуоһунньуктарыттан биир бастыҥнарынан ааттанар, Сунтаартан төрүттээх, СӨ ускуустубатын үтүөлээх диэйэтэлэ Андрей Васильевич Чикачев быыстапката олунньу 10 күнүгэр оройуоннааҕы “Айылгы” НАДь-гэр “Мунхаалап куйаара” аныгы ускуустуба галереятыгар эбиэттэн киэһэ 15 чааска арыллыаҕа диэн култуура үлэһиттэрэ иһитиннэрэллэр.

Андрей Чикачев быыстапкалара Арассыыйаҕа, ону ааһан омук дойдуларыгар ситиһиилээхтик туруоруллаллар. Кини хартыыналарыгар биир үгүс тыа сирин олоҕо, дойдубут кэрэ айылҕата көстөр. Сунтаардар айылҕаттан айдарыылаах худуоһунньуктарын талааныгар сүгүрүйэн, 2017 сыллаахха улуус баһылыга Анатолий Григорьев илии баттаан “Сунтаар улууһун Бочуоттаах олохтооҕо” диэн бэлиэни туттаран турардаахтар.

ЫСПЫРААПКА

Саха живописеһа, РФ худуоһунньуктарын Сойууһун чилиэнэ Андрей Васильевич Чикачев 1967 сыллаахха Ньурба улууһун Марха бөһүөлэгэр күн сирин көрбүтэ. 1987 сыллаахха  Дьокуускайдааҕы уус-уран училищены онтон 1994 сыллаахха Уһук Илиннээҕи уус-уран инстутут живописнай салаатын ситиһиилээхтик үөрэнэн бүтэрбитэ.

Худуоһунньук куруук көстөр олоҕу хайдах эрэ кэтэһиллибэтэх өттүттэн көрдөрөр ураты дьоҕурдаах. Бастакы тус быыстапката «Күн дьоно» («Люди Солнца») 2012 сыллаахха Ясная Полянаҕа, ол кэннэ Москваҕа РФ Государственнай Думатыгар, Санкт-Петербурга Гостинай Дворга, Россия киин куораттарыгар Саха Сирин Күннэрин чэрчитинэн көрдөрүллүбүттэрэ. 2013 сыл тохсунньу 17 күнүгэр Дьокуускайга НХМ быыстапкатын саалатыгар үлэлэрин тус быыстапката аһыллыбыт.

Кини киэҥ эйгэҕэ биллэр үлэлэринэн:

  • Күһүн (1996);
  • Сайын (1996);
  • Ыра санаа (1997);
  • «Одуванчики. Три грации» (2002);
  • «Эбэ о5ото» (2004);
  • «Бэрт Бэргэнчэ» (2006);
  • «Мунду бухатыыра» (2008);
  • «Коббойдар»;
  • «Көмүс ардах» (2012), — буолаллар.

 

Сэмэн ЖЕНДРИНСКЭЙ