Бүгүн о.э. ыам ыйын 28 күнүгэр, Чурапчы улууһун килбэйэр киинигэр Чурапчы сэлиэнньэтин Прасковья Борисова аатынан “Улыбка” оҕону сайыннарар киин былаһаакката толору оҕо чаҕаарыйар саҥатынан, ырыанан-тойугунан, үҥкүүнэн-битиинэн туолла: “Мы – Орлята России!” – диэн тыллар элбэхтэ иһилиннилэр.
Аан бастакытын ыытыллар улахан дьаһал, Дойдуга Дьиэ кэргэн, Саха сиригэр Оҕо саас сылларыгар ананан илин эҥэр “Арассыыйа хотойчооннорун” слетун үөрүүлээх арыллыыта буолла. Бүгүҥҥү слекка барыта холбоон 11 хамаанда кыттыыны ылыаҕа.
Ол курдук: Амма улууhун Леонид Киренский аатынан Амма лицейын 3 кылааһын үөрэнээччилэрэ, салайааччылара Зинаида Бураева, хамаанда аата “Голубые береты”, Мэҥэ Хаҥалас улууһуттан Александр Пахомов аатынан Тиэлиги орто оскуолатын 3 кылааһын үөрэнээччилэрэ уонна салайаачылара Галина Аргунова, хамаанда аата “Лучики”, Алексей Шахурдин аатынан Төҥүлү орто оскуолатын 3 кылааһын үөрэнээччилэрэ, салайааччы Мария Попова, хамаанда аата “Тэтим”, Таатта улууһуттан Авксентий Мординов аатынан Таатта лицейын 3 кылааһын үөрэнээччилэрэ, салайааччы Айыллаана Жиркова, хамаанда аата “Лучики”, Томпо улууһун Мэҥэ Алдан нэһилиэгин Егор Неймохов аатынан орто оскуола 3 кылааһын үөрэнээччилэрэ, салайааччы Фатима Колодезникова, хамаанда аата “Феникс”, Томпо улууһун Ефим Протопопов аатынан Саһыл орто оскуолатын 3 кылааһын үөрэнээччилэрэ, салайааччы Татьяна Ворогушина, хамаанда аата “Сулустар”, Уус Алдан улууһун Алекандр Жирков аатынан Бэйдиҥэ орто оскуолатын 3 кылааһын үөрэнээччилэрэ, салайааччы Николай Яковлев, хамаанда аата “Патриоты”, Уус Алдан улууһун Лөгөй интэринээт-лицейын 3 кылааьын үөрэнээччилэрэ, салайааччы Наталья Олесова, хамаанда аата “Лөгөй Чөрөй”, Чурапчы улууһун Семен Флегонтов аатынан Хадаар орто оскуолатын 3 кылааһын үөрэнээччилэрэ, салайааччылара Александр Лукин, хамаанда аата “Веселые лучики”, Чурапчы улууһун Семен Новгородов аатынан Чурапчы орто оскуолатын 3 кылааһын үөрэнээччилэрэ, кылаас салайааччыта Луиза Максимова, хамаанда аата “Искрята” кыттыыны ылыахтара.
Слет үөрүүлээх арыллыытыгар Чурапчы улууһун дьаһалтатын ыччаты кытары үлэҕэ исписэлииһэ Александра Хомус, Чурапчы улууһун үөрэҕин управлениетын начаалынньыгын 1-кы солбуйааччы Ираида Винокурова кыттыыны ыллылар.
“Бүгүҥҥү дьаһалбыт Чурапчы улууһун устуоруйатыгар букатыннаахтыы хаалар күн. Ол эбэтэр “Арассыыйа хотойчоонноро” слет эрэгийиэҥҥэ уонна чуолаан илин эҥэр улуустарын холбоон Чурапчыбыт улууһугар аан бастакытын ыытыллар. Былаан быһыытынан илин эҥэр 7 улууһа бары түмсүөхтээх этибит ону убаастанар биричиинэн Өймөкөөн эрэ улууһа кыайан кэлбэккэ хаалла. Инньэ гынан 6 улуустан 130-ча оҕо муһунна. Тэрийээччилэр салайааччылары кытары ааҕан туран 30-быт. Түмүккэ анал номинациялары туттаран, бириистэринэн наҕараадаланыахтара”, — диэн Чурапчы улууһун дириэктэрдэрин иитэр үлэҕэ сүбэһиттэрин куратора Евгения Горохова кэпсээтэ.
Хамаандалары барыларын кэрийэ сылдьан ыйыталастахха: “Чурапчы улууһа наһаа үчүгэйдик көрүстэ, күммүт да туран биэрдэ. Бу улахан дьаһалга бэлэмнэммиппит ыраатта. Чуолаан алын сүһүөх кылаас оҕолоругар маннык тэрээһиннэр наһаа наадалар, биир сиргэ тууйуллан олорон хаалбакка, оҕолор бэйэ-бэйэлэрин кытары билсиһэллэрэ тоҕоостоох”, — диэн биир киһи курдук хоруйдаатылар.
Санатан эттэххэ, 11 хамаанда бүгүҥҥү күҥҥэ 12 түһүмэҕинэн кыттыаҕа, үөрэнээччилэр номнуо бастакы “Бэйэни билиһиннэрии” нүөмэрдэрин көрдөрдүлэр.
Сэмэн Жендринскэй. Ааптар хаартыскаҕа түһэриитэ