Чурапчы улууһун дьаһалтатын аактабай саалатыгар хорсун-хоодуот буойуну, ыаллыы сытар Таатта улууһун Туора Күөл сэлиэнньэтиттэн төрүттээх «Бурхат» диэн позывнойдаах Родимир Максимовы уруйдуу көрүстүлэр. Санатан эттэххэ, Родимир быйыл саас хорсун быһыытын иһин Арассыыйа Дьоруойун аатын ылбыта. Кини өстөөх түөрт атаакатын тоҕо анньан, штурмовой бөлөххө бойобуой табаарыстарын кытары 30 боевигы суох оҥорбута. Эдэр байыас төһө да бааһырдар, туруоруллубут сорудахтары барытын толорбута. Родимир көмөтүнэн Арассыыйа сэбилэниилээх күүстэрэ ылбыт кирбиилэрин туруулаһан көмүскээбиттэрэ.
Бүгүҥҥү үөрүүлээх быһыыны-майгыны үгэс быһыытынан арчылааһынтан саҕалаатылар. Алгыс сиэрин-туомун Айылгы Пинигина толордо.
Киирии тылы улуус баһылыга Степан Саргыдаев эттэ. Кини тус этиитигэр Саха сириттэн уопсайа 9 Арассыыйа Дьоруойа баарын, ону таһынан онус Сунтаартан сылдьар байыас үрдүк наҕараадаҕа түһэриллибитин, олортон биирдэстэринэн ытыктабыллаах Родимир Максимов буоларын бэлиэтээтэ. Бурхат өстөөх кимэн киириитигэр хорсуннук киирсибитин, ол кыргыһыыга «Сокол” уонна “Вован” диэн позывнойдаах биир дойдулаахтарбыт – Хадаартан төрүттээх хорсун уолаттарбыт Прокопий Степанович уонна Владимир Владимирович хорсуннук, ийэ дойдуларын чиэстээхтик көмүскүү сылдьан, сырдык тыыннара быстыбытын сырдатта. Тэрээһин кыттыылаахтара кинилэр сырдык ааттарыгар сүгүрүйэн мүнүүтэ устата соҥуоран турдулар. Салгыы улуус баһылыга Родимир Дмитриевиһы Арассыыйа үрдүкү наҕараадата иҥэриллибитинэн эҕэрдэлээтэ итиэннэ 300 тыһ. суумалаах сэртипикээти дохсун ытыс тыаһын ортотугар туттарда. Маны сэргэ байыас күн күбэй ийэтигэр Варвара Николаевнаҕа Дьоруойу иитэн таһаарбытыгар махтанна.
Салгыы улуус дьокутааттарын Сэбиэтин бэрэссэдээтэлэ Яков Оконешников, нэһилиэктэр баһылыктарын ааттарыттан Чурапчы нэһилиэгин баһылыга Владимир Сивцев, Чурапчы улууһун Бойобуой дьайыы бэтэрээннэрин Сэбиэтин бэрэссэдээтэлэ Семен Жендринскэй эҕэрдэлэрин, истиҥ тылларын анаатылар.
Родимир Максимов олоҕун ыарахан түгэннэрэ Хадаар уолаттарын кытта ааспытын ахтан-санаан ааста. Кинилэр ытык ийэлэригэр Вера Афанасьевнаҕа уонна Евдокия Петровнаҕа сибэкки дьөрбөтүн туттарда. Бу күн Арассыыйа Дьоруойа Чурапчы устудьуоннарын уонна үөрэнээччилэрин кытта көрүстэ.
«Ыаллыы сытар Чурапчы дьоно-сэргэтэ олус истиҥник көрүстүлэр. Бу тэрээһиҥҥэ үөрүүбүн үллэстэн кэлбиккитигэр махтанабын. Билигин дойдубутугар ыарахан кэмнэр тураллар. Онуоха биһиги, эдэр ыччаттар, дойдубутун көмүскүүр саамай эппиэтинэстээх кэмнэрбит. Онон кэнчээри ыччаттары кытта көрсүһэн астынным, инникигэ эрэллээхпин. Сэрии Кыайыынан түмүктэнэригэр эрэнэбин», — диэн Родимир Дмитриевич санаатын үллэһиннэ.
Варвара Максимова, Дьоруой ийэтэ:
— Чурапчы дьоно-сэргэтэ сылаастык, истиҥник көрүстүлэр. Педагог киһи быһыытынан, маннааҕы кэллиэгэлэрим оҕону үтүө майгылаах-сигилилээх, дойдуга бэриниилээх буола улааталларыгар биир санаалаах үлэлииллэрин көрөн-истэн билэбин. Бу – хайҕаллаах дьыала. Билиҥҥи ыччакка бүгүҥҥү күн Дьоруойдара холобур буола турдуннар!
Марфа Петрова. Людмила Горохова, Семен Жендринчкэй хаартыскаҕа түһэриилэрэ.
