Бүгүн Ороһооспо чэчиэринньигэ күн. Онно сөп түбэһиннэрэн эбитэ дуу, Чурапчы нэһилиэгин “Куоҕалы” түөлбэтигэр остуоруйа алыптаах дойдута тиэргэннээх Коркиннар дьиэ кэргэттэрин иккис сылбытын суруйан таһаарабыт.
Кинилэр кимнээҕий? Хайахсыттан уонна Кытаанахтан силистээх-мутуктаах, “Куоҕалы” түөлбэ төрүт олохтоохторо Екатерина Васильевна уонна Василий Гаврильевич Коркиннар буолаллар.
Сааһын тухары тутуу үлэһитэ Василий Гаврильевич, урут хаһан даҕаны маннык хаар оҥоһуктарынан үлүһүйбэтэҕин итиэннэ бочуоттаах сынньалаҥҥа таах олоруохтааҕар дьарыктанарын билинэр: “Оҕолор, сиэттэр кэлэллэригэр анаан 2022 сылтан саҕалаан тиэргэммитин киэргэтэр буолбуппут. Быйыл, былырыыҥҥытааҕар аҕыйах хаар оҥоһугу туруордум, 42 эрэ баар быһыылаах.
Хаарбыт наһаа аҕыйах, уруккуттан даҕаны бэйэбит Сахабыт сирин кыылларын бөрөлөрү, саһыллары, куобахтары, үрүҥ эһэлэри о.д.а. оҥоро соруннум, быйыл кырааската суох буолла. Дьиҥэр хаар элбэҕэ буоллар Муома хайларын курдук фон оҥорон, уотун-күөһүн дьүкээбил курдук түһэрэн ыраах хоту дойду үрүҥ эһэлэригэр тиийэ оҥоруохтааҕым хаалла. Биэс ыал Куоркуттар буоламмыт мустаммыт саҥа дьыллыыбыт, дьоннор син кэлэ-бара интэриэһиргээннэр көрөллөр. Бэйэм тутуу эйгэтигэр күн-бүгүҥҥээҥи диэри үлэлиибин, олоҕум аргыһа Екатерина Васильевна иистэнньэҥ”.
Бу курдук, дьоҥҥо-сэргэҕэ саҥа дьыллааҕы настырыанньаны бэлэхтиир, бөһүөлэк иһинээҕи дьиэ тэлгэһэлэрэ туспаҕай көстүүлээх буоларыгар сэмэй кылааттарын киллэрэр күндү дьоммутугар бары үтүөнү, сырдыгы баҕарыаҕын. Үүммүт 2025 сыл хайаан даҕаны ситиһиилээх, иллээх-эйэлээх буолуохтун!
Сэмэн ЖЕНДРИНСКЭЙ. Ааптар хаартыскаҕа түһэриитэ