Оройуоммутугар баар-суох, саамай кырдьыктаах, официальнай статустаах “Саҥа олох” хаһыатыгар сурутуу тиһигин быспакка ааҕааччыларын кытары үлэни салгыы ыытар. Бу күннэргэ, улуустааҕы “Айылгы” НАДь-тин кэлэктиибэ, дириэктэр Розалия Игнатьева салалтатынан быйылгы сыллааҕы хаһыакка бука бары биир киһи курдук 100% суруттардылар.
Хаһыат диэн — устуоруйа! Хаһыакка суруллуу, хаһыакка тахсыы улахан чиэс-бочуот. Тоҕо диэтэргит, хаһыат хас биирдии нүөмэрэ барыта бибилэтиэкэлэринэн, архыыптарынан, Москубаҕа тиийэ устуоруйа кэрэһитин быһыытынан кичэллээхтик ууруллан, хас биирдии нүөмэринэн тиһиллэн иһэр. Кэлэр көлүөнэҕэ анаан. Этэргэ дылы, суруллубут — суоруллубат!
“Биһиги кэлэктииппит хаһыакка бука бары суруттардылар. Улууспут хаһыатын ааҕары таһынан, үлэбитинэн күннээҕи түбүкпүтүгэр даҕаны туһанарбыт олус үгүс. Тыыннаах хаһыаты дьон-сэргэ сэҥээрэр, улууска ыытыллар тэрээһиннэр, дьаһаллар тиһиллэн архыыпка киирэллэрэ бу үйэтитии биир көрүҥэ диэн сыаналыыбыт. Инньэ диэн туран, Чурапчыбыт улууһун олохтоохторун “Саҥа олох” тыыннаах хаһыаппытыгар бука бары суруттарыаҕыҥ”, — диэн “Айылгы” НАДь-тин дириэктэрэ Розалия Ивановна бэйэтин санаатын эттэ.
Манна даҕатан эттэххэ, улууспут хаһыатыгар Ис дьыала министиэристибэтин Чурапчытааҕы отделын үлэһиттэрэ (начаалынньык Иннокентий Свинобоев), Прасковья Борисова аатынан “Улыбка” оҕону сайыннарар киин-уһуйаан (сэбиэдиссэй Екатерина Иванова), “Туллукчаан” уһуйаан кэлэктиибэ (сэбиэдиссэй Альбина Варламова), “Мичил” уһуйаан кэлэктиибэ (сэбиэдиссэй Марианна Яковлева), Мария Спиридонова аатынан “Чуораанчык” уһуйаан кэлэктиибэ (сэбиэдиссэй Августина Захарова), Чурапчытааҕы ветеринария кэлэктиибэ (салайааччы Лена Архипова), Чурапчытааҕы судаарыстыбаннай физическай култуура уонна успуорт үнүстүүтүн кэлэктиибэ (ректор Иннокентий Готовцев) сылын аайы көхтөөхтүк хаһыакка суруттараллар. Кинилэр кэккэлэригэр олус түмсүүлээх, айымньылаах үлэлээх, үгүс түбүктээх “Айылгы” НАДь-тин кэлэктиибэ эбиллибититтэн олуһун үөрэбит.
Улуускут хаһыатын сэҥээриҥ, “Саҥа олоҕу” ааҕыҥ, “Саҥа олоҕу” кытары бииргэ буолуҥ! “Саҥа олоххо” суруйуҥ! “Саҥа олоххо” суруттарыҥ!
Сурутууну ыытта Сэмэн Жендринскэй. Доржукай Монгуш хаартыскаҕа түһэриитэ