«Аартык» потребительскай кэпэрэтиип 2023 сыллаах үлэтин түмүгүн пайщиктаахтарга отчуоттаата. Сүрүн дакылааты Бырабылыанньа бэрэссэдээтэлэ Татьяна Михайлова оҥордо.
Ааспыт сыл муус устар 7 күнүгэр «Маарыкчаан» потребительскай уопсастыба боломуочуйалаах пайщиктаахтарын быһаарыыларынан, «Аартык» потребительскай кэпэрэтиип тэриллибитэ. Бу кэпэрэтиипкэ 36 пайщик, маны сэргэ Болугур, Хатылы, Одьулуун, Мугудай нэһилиэгин маҕаһыыннара, «Чурапчы» ХЭТ уонна улуус нэһилиэнньэтин килиэбинэн хааччыйар бэкээринэ киирэллэр.
Кэпэрэтиип сыл устата улууска көдьүүстээхтик үлэлээн кэллэ. Атыы-эргиэн үлэһиттэрэ бэриллибит былааннарын ситиһиилээхтик толороллор. Табаар саппааһа, көрүҥэ кэҥээн, атыы нэһилиэнньэҕэ сөптөөхтүк тэриллэр. Ааспыт сыл түмүгүнэн маҕаһыыннар икки ардыларыгар Татьяна Сергеева сэбиэдиссэйдээх Болугур нэһилиэгин маҕаһыына үрдүк көрдөрүүнү ситиһэн, “Бастыҥтан бастыҥ” номинация хаһаайынынан ааттаммыт. Мугудай маҕаһыынын кэлэктиибин, сэбиэдиссэй Екатерина Михайлованы нэһилиэнньэ убаастыыр. Людмила Дьячковская сэбиэдиссэйдээх Одьулуун маҕаһыыныгар уопуттаах, бэриниилээх кэлэктиип үлэлиир. Хатылы маҕаһыыныгар соҕотох үлэлиир атыыһыт Сюзанна Захарова дьон биһэрибилин ылыан ылар.
Оҥорон таһаарыы эйгэтин бэлиэтиир буоллахха, икки бэкээринэ сыл устата 582 туонна килиэби уонна 47 туонна буулка оҥоһуктары астыыллар. Нэһилиэнньэҕэ уопсайа 15 көрүҥ килиэби уонна буулка оҥоһугу атыыга таһаараллар. Чурапчы улууһун уонна Кыйы бөһүөлэгин толору хааччыйаллар. Ол курдук, 40 чааһынай маҕаһыыҥҥа бородууксуйаларын тиэрдэллэр. Чурапчы бэкээринэтэ үчүгэй барыһы ылар. Сэбиэдиссэйинэн өр сылларга Матрена Аянитова таһаарыылаахтык үлэлээн кэллэ. Ону таһынан биир бэкээринэ Мугудайга Степанида Пантилова сэбиэдиссэйдээх үлэлиир.
Ааспыт сылга үлэ усулуобуйатын тупсарыыга үгүс үлэ ыытыллыбыт. Ол курдук, 5 эбийиэги гаас ситимигэр холбообуттар, маны тэҥэ хас да эбийиэккэ толору хааччыллыыны киллэрбиттэр, дьиэ иһин-таһын өрөмүөннээбиттэр. Маны таһынан үлэһиттэригэр хамнастарын кээмэйин улаатыннарыыны, кварталлааҕы бириэмийэни олохтууру ситиспиттэр.
Ахсынньыга Арассыыйатааҕы ырытар, чинчийэр киин иһинэн ыытыллыбыт чинчийии түмүгүнэн «Чурапчы» ХЭТ регион социальнай-экономическай уонна оҥорон таһаарыы сайдыытыгар сүҥкэн кылаатын иһин “Лучшее предприятие отрасли” номинация кыайылааҕынан тахсыбыт.
Мунньахха пайщиктаахтар бырабылыанньа үлэтин сөптөөҕүнэн сыаналаатылар, тахсыбыт барыс пуонданы хаҥатыыга ананыаҕа.
Марфа Петрова.