Бүгүн о.э. олунньу 24 күнүгэр, Аҕа дойду көмүскээччилэрин күнүн чэрчитинэн, успуорт туонатынан сураҕырбыт Чурапчы туонатыгар икки улахан күрэхтэһии саҕаланна.
Маҥнай, Ушницкайдар дьиэ кэргэттэрэ олорбут өтөхтөрүгэр, кыра уоллара Руслан Викторович көҕүлээһининэн “Бэргэн” бильярд кулуубугар быйыл IV-с төгүлүн, Анастасия Семеновна Ушницкая сырдык кэриэһигэр эрэгийиэннээҕи күрэхтэһии саҕаланна. Урукку сылларга кэрэ аҥаардар паараларыгар ыытыллыбыт эбит буоллаҕына быйыл толору, эр дьоҥҥо ананан тэрилиннэ.
Манна Амма, Таатта, Уус Алдан уонна Чурапчы улууһуттан барыта холбоон 28 хамаанда, 56 кыттааччы суруттарда. Күрэхтэһии үөрүүлээх арыллыытыгар Чурапчы улууһун баһылыга Степан Саргыдаев, улуус дьокутааттарын Сэбиэтин бэрэссэдээтэлэ Яков Оконешников, Анастасия Семеновна төрөппүт уолаттара Семен, Иннокентий Архиповтар, Руслан Ушницкай эҕэрдэ тыллары эттилэр, күрэхтэһии ыытыллар сүрүн балаһыанньатын иһитиннэрдилэр.
“Быйылгы күрэхпит сүрүн уратыта диэн, эрдэ наар дьахталларга анаан тэрийэр эбит буоллахпытына, быйыл илин эҥэр эр дьонноругар диэммит пааранан хамаандалары тэрийэн эрэбит. Тэрийэр таһыммыт арыый даҕаны үрдүк буолан элбэх киһи кэллэ. Бүгүҥҥү күннээххэ үс остуолунан сылдьаннар оонньуохтара, бэйэм санаабар сүрдээх интэриэһинэй киирсиилэр буолуохтара. Дьэ манна, Таатта улууһуттан Валентин Легушев диэн өрөспүүбүлүкэҕэ ыытыллар бары күрэхтэһиилэргэ ситиһиилээхтик кыттар уол кэллэ, бэдэрээссийэлэрин бэрэссэдээтэлэ Прокопий Егорович бэйэтинэн кэллэ, эмиэ олох үчүгэйдик оонньуур. Амма улууһун бильярд көрүҥүн бэрэссэдээтэлэ Григорий Григорьевич баар, кини бэйэтэ эмиэ биир туспа суоллаах-иистээх оонньооччу буолар. Уус Алдантан Михаил Михайлович бэрэссэдээтэллээх халыҥ хамаанда кэллэ. Холобур бу курдук бэйэлэрин улуустарын чиэһин көмүскүү кэлбиттэрэ сүрдээх хайҕаллаах. Онтон Чурапчыбыт улууһуттан 18 киһи баар. Манна биһиги киэн туттар оонньооччуларбытыттан Прокопий Макаровы, Мария Игнатьеваны ааттаыахпын сөп”, — диэн улууска бильярд бэдэрээссийэтин бэрэссэдээтэлэ, улуус мунньаҕын дьокутаата Иннокентий Архипов кэпсээтэ.
“Боотур Уус” стадион ытар тииригэр, Чурапчы улууһун бойобуой дьайыы бэтэрээннэрин бириистэригэр буулдьа саанан ытыыга аһаҕас турнир үөрүүлээх арыллыыта буолла. Уопсай бириис пуондата 48 тыһыынча солкуобайга тэҥнэстэ, манна сүрүн успуонсардарынан улуус ытыыга бэдэрээссийэтин бэрэссэдээтэлэ Гаврил Владимиров, улуустааҕы бойобуой дьайыы бэтэрээннэрин Сэбиэтэ, урбаанньыт Сергей Седалищев буоллулар.
“Бүгүҥҥү күрэхтэһиибитигэр дьахталлар уонна эр дьоннор кыттыыны ылыахтара. Упражнениелар тустарынан эттэххэ “МВ-2” диэн о.э. кыра калибрдаах бинтиэпкэ саа. Сытан эрэ 50 миэтэрэҕэ ытыахтара. Эр дьоҥҥо 14 кыттааччы суруттарда онтон дьахталлар бэһиэлэр”, — күрэхтэһии сүрүн судьуйата Василий Давыдов эттэ.
Кыайыылаахтар мэтээллэринэн, кубоктарынан, анал бириистэринэн итиэннэ харчынан бириэмийэлэниэхтэрэ.
Сэмэн Жендринскэй. Ааптар хаартыскаҕа түһэриитэ