Чурапчыга 25 лааҕыр оҕо сынньалаҥын тэрийиэҕэ

Өрөспүүбүлүкэ үрдүнэн оскуола үөрэнээччилэригэр араас хайысхалаах  лааҕырдар аһыллан билигин үлэлэрин үгэнэ. Быйыл Чурапчы улууһун үрдүнэн уопсайа 25 лааҕыр үлэлиэҕэ.

Үөрэх управлениетын иитэр-үөрэтэр отделын кылаабынай исписэлииһэ Эрэл Аммосов: «Улууспутгар 19 күнүскү, 2 хонуктаах, 4 балааккаҕа хонуктаах лааҕырдар үлэлиэхтэрэ.  Ол курдук, «Кустук» лааҕыр 360 оҕону хабан, 4 сезон устата үлэлиэҕэ. Бастакы сезона түмүктэммитэ, сотору кэминэн иккис сезон саҕаланыахтаах. «Дабаан» лааҕыр 150 оҕону хабан, 3 сезон үлэлиирэ былааннанар. От ыйын 8 күнүттэн бастакы сезон саҕаланар. Улууспутугар балааккаҕа хонуктаах биэс лааҕыр үлэлиэҕэ. Дириҥҥэ «Бырыы»,  Мырылаҕа «Тэйэр», Чакырга  «Дьулуур», Чурапчытааҕы гимназия «Горизонт» лааҕырдар иккилии — үстүү сезон устата оҕо сынньалаҥын тэрийиэхтэрэ. Бары сезон ахсын 25-ти оҕону хабан, 14 хонук үлэлиэхтэрэ.

Оскуолаларынан 19 күнүскү лааҕыр үлэлиир: Хатылы, Одьулуун, Төлөй, Бахсы, Соловьев, Арыылаах, Болтоҥо, Сылаҥ, Алаҕар, Хайахсыт, Дириҥ, Кытаанах,  Хадаар, Мугудай, Улахан Күөл, МУПК, Гимназия, С.А. Новгородов, И.М. Павлов аатынан орто оскуолаларга.

Маны сэргэ, хас да оҕо Регионнааҕы, Өрөспүүбүлүкэтээҕи лааҕырдарга хабыллан сынньана сылдьаллар. Краснодарскай кыраайга квотанан 11 оҕо, өрөспүүбүлүкэтээҕи «Кэскил”, “Сосновый Бор”, “Энергетик” лааҕырдарга 7 оҕо босхо сынньанан кэллилэр. Балаҕан ыйыгар 15 байыаннай дьайыы кыттыылаахтарын оҕолоро Краснодар куоракка бараллара былааннанар. Өрөспүүбүлүкэтээҕи лааҕырдарга 16 оҕо барыахтаах. Лааҕырдар бастакы сезоннарын түмүгүнэн улуус оҕолорун 50% сайыҥҥы сынньалаҥынан  хабан олоробут», — диэн билиһиннэрдэ.

Оттон бу күннэргэ Чурапчы нэһилиэгэр С.К. Макаров аатынан Чурапчы улууһун гимназиягар «РМиД наука» диэн күнүскү лааҕыр үлэлии турар. Бу лааҕырга уопсайа 25 оҕо бэс ыйын 26 күнүттэн 14 хонук устата иллэҥ кэмнэрин туһалаахтык атаарыахтара.

«Оҕолор сайыннарыылаах математика, физика уруоктарыгар дьарыктаналлар. Ону таһынан, уруоктар кэннилэриттэн головоломкалары хомуйаллар, саахымат, дуобат курдук өйү сайыннарар, эти-хааны эрчийэр хамсаныылаах оонньуулары оонньууллар», — диэн Чурапчы гимназиятын математикаҕа учуутала, лааҕыр баспытаатала Таисия Сивцева үллэстэр.

Людмила Горохова, ааптар хаартыскаҕа уонна видеоҕа устуута.