Ааспыт нэдиэлэ бүтүүтэ интэринээт-оскуола түөлбэтигэр улуустааҕы «Утум» дьиэтиттэн норуот уус-уран оҥоһуктарын түһүлгэтэ ыалдьыттаата. Бастатан туран, бууктаах сон тигиитин ымпыгын-чымпыгын сөҕө иһиттибит (сал.Ахматова Н.П.), салгыы кыл-сиэл кистэлэҥнэрин (сал. Бурнашева В.Г.) кыратык сэгэтэн көрдүбүт, бэйэбит кыыспыт Слепцова Н.В. оҕуруо, кыбытан тигии маастарыстыбатын толору баһылаабытын өссө төгүл көрөн итэҕэйдибит. Кэлбит кыргыттар бары да иис диэн баран «муннукка ытаабыт» кэрэ аҥаардар буолан биэрдилэр.
Ыһыахха кэтиллэр ырбаахылара, хаһыаччыктара бэйэтэ туспа суолунан араастаан мындырдаан тигиллибитэ киэҥ сэҥээриини ылыан ылла. Кэлэктиип өссө биир суолталаах улахан үлэтинэн буолбут бүтүн өрөспүүбүлүкэбит каартатын, сүрэхтэрин сылааһын иҥэрэн, илиилэринэн тикпиттэрин көрөммүт «биһиэхэ Чурапчыга да нарын, уус кыргыттар бааллар да эбит ээ»,- диэн киэн туттуу санаата баһыйда. Кэлбит ыалдьыттар мунаарар боппуруостарыгар сөптөөх харданы ылан, астынан тарҕастылар.
Октябрина Окорокова