Бары билэргит курдук, бэс ыйын 18 күнүгэр дойдубут бэрэсидьиэнэ Владимир Путин үлэтин чэрчитинэн Сахабыт сиригэр кэлэн барда. Бу биһиги төрөөбүт дойдубут устуоруйатыгар киирэр ураты суолталаах күн буолла.
Бу туһунан Чурапчы улууһун кылаабынай бырааһа Николай Сивцев санаатын үллэстэр: «Владимир Владимирович бу сырыытыгар өрөспүүбүлүкэбитигэр IT эйгэтин, креативнай кластер ситиһиилэрин көрбүтүн-истибитин таһынан «Земский учитель», «Земский доктор», «Муравьев-Амурский 2030» бырагыраамалар кыттыылаахтарын, эдэр исписэлиистэри кытары көрсөн кэпсэппитэ үтүө түмүктэрдээх буолуо дии саныыбын. Биһиги тыа сиригэр олорорбут быһыытынан маннык эдэр исписэлиистэр кэлэн олохсуйан үлэлииллэригэр туһуламмыт, кинилэргэ үчүгэй усулуобуйаны тэрийэр бырагыраамалар бааллара олус улахан суолталаах дии саныыбын. Демография да көрдөрүүтэ үрдүүрүгэр, олохпут уйгута да тупсарыгар төһүү күүс буолаллар. Холобур, Владимир Владимирович: «Земский учитель» уонна «Земский работник культуры» бырагыраамаларынан эбии үөрэхтээһин уонна оскуола иннинээҕи саастаах оҕолору иитэр-уһуйар үлэһиттэр эмиэ туһаналлара кыаллар гына толкуйдуохпут»,-диэбитин биһирээтим.
Бэйэм быраас буоларым быһыытынан, бу «Земский доктор» эмиэ салгыы үлэлээн, сайдан, тыа сиригэр доруобуйа харыстабылын эйгэтигэр үгүс эдэр исписэлиис кэлэригэр төһүү күүс буоларыгар баҕарабын. Каадырынан хааччыллыы нэһилиэктэргэ уустук боппуруос буолара кистэлэ суох. Онон инникитин дойдубут бэрэсидьиэнэ эппит тыллара олоххо киирэн, Сахабыт сирэ туругура, сайда турдун диэн баҕа санаалаахпын».
Наталья Сибирякова