От ыйын 8-10 күннэригэр Мэҥэ Хаҥалас Майа нэһилиэгэр “Сельская школа&Образовательная марка-2024” үөрэх үлэһиттэрин дьаарбаҥкалара буолла. Улуустан 200-тэн тахса педагог тиийэн, бэйэлэрин уопуттарын кэпсээтилэр, бырайыактарын көмүскээтилэр.
Ол курдук, улуус дэлэгээссийэтэ 73 инновационнай бырайыагынан кытынна. Ол түмүгэр Мэҥэ Хаҥалас улууһун баһылыгын 30000 гранын Чакыр нэһилиэгэ “Төрүт ситим олоҥхонон – төрүт нэһилиэстибэ үөрэҕинэн тыа сиригэр үлэни-хамнаһы тэрийии” бырайыагынан ылла. СӨ Үөрэх министиэристибэтин гранын уонна Г.П. Андреев аатынан анал ааты Хадаар оскуолатын “Аныгы алаас хаһаайына” бырайыага тутта. СӨ гранын уонна А.Н. Анисимова аатынан анал ааты Хатылы оскуолатын “Инновационный образовательный кластер” бырайыага ылла.
“Цифровая школа IT, повышение финансовой грамотности детей” хайысхаҕа 20000 солкуобайдаах анал бирииһи улуустааҕы үөрэх салалтатын “К разработке мобильных приложений для ОС Андроид” уонна Болтоҥо оскуолатын “УОТ IT” бырайыактара ыллылар.
Сберүөрэхтээһин анал бирииһинэн Чурапчытааҕы “Чуораанчык” уһуйаан “Роль госпаблика в позиционировании детского сада “Чуораанчык” в медиа пространстве” бырайыага наҕараадаланна.
Елена Макаринская