“Чурапчы улууһа” МТ баһылыга Степан Саргыдаев улууспут оскуолаларын салайар дуоһунастарыгар саҥа үлэһиттэри анаата.
Саха норуотунай суруйааччы Василий Яковлев-Далан аатынан Кытаанах орто оскуолатын дириэктэрэ Яковлев Вячеслав Михайлович дуоһунаһыттан баҕа өттүнэн уурайда. Кини оннугар Коркин Иван Иванович ананна.
Коркин Иван Иванович бэс ыйын 26 күнүгэр 1991 сыллаахха Чурапчы улууһун Килэҥки бөһүөлэгэр күн сирин көрбүтэ. 2012 сыллаахха Чурапчытааҕы Судаарыстыбаннай физическай култуура уонна успуорт үнүстүүтүн ситиһиилээхтик түмүктээн физкултуура учууталын исписээлинэһин баһылаабыта. 2015-2021 сылларга Василий Яковлев аатынан Кытаанах орто оскуолатыгар физкултуура учууталынан үлэлээбитэ.
Уорҕа учаастагар оскуола дириэктэринэн Копылов Михаил Семенович ананна
Михаил Семенович Копылов сэтинньи 15 күнүгэр1982 сыллаахха Ньурба оройуонун Ньурбачаан нэһилиэгэр төрөөбүтэ. 2016 сыллаахха Чурапчытааҕы Судаарыстыбаннай физическай култуура уонна успуорт үнүстүүтүн итиэннэ ити сыл Дьокуускайдааҕы тыа хаһаайыстыбатын академиятыгар “Агроинженерия” салаатын бүтэрбитэ. 2016-2021 сылларга Чурапчы нэһилиэгин “Кэскил” уһуйааныгар оҕолору эт-хаан өттүнэн иитиигэ инструктордаабыта. 2021-2022 сылларга Үрэх Күөрэ учаастагын алын сүһүөх оскуолатыгар уонна уһуйааныгар дириэктэр эбээһинэһин толорооччунан оттон 2022-2024 сылларга Кындал учаастагын алын сүһүөх оскуолатын уонна уһуйаанын дириэктэринэн үлэлээн кэллэ.
Кындал учаастагар оскуола дириэктэринэн Колесов Конфей Кимович ананна
Колесов Конфей Кимович кулун тутар 29 күнүгэр 1967 сыллаахха Уус Алдан оройуонун Бороҕон сэлиэнньэтигэр күн сирин көрбүтэ. 1984 сыл бэс ыйыттан саҕалаан атырдьах ыйыгар диэри үлэтин Эрилик Эристиин аатынан сопхуоска оробуочайынан үлэлээн саҕалаабыта. 1992-1993 сыллаахха Дириҥ орто оскуолатыгар физика уонна информатика учууталынан үлэлээбитэ. 1993-1994 сылларга “АММА ПОДАНИДАЙМОНД” ХЭТ дириэктэрэ. 1994-1997 сылларга “Кындал” бааһынай хаһаайыстыба баһылыга. 1997-1998 сылларга Болтоҥо нэһилиэгин баһылыга. 1998-2001 сылларга Чурапчы улууһун дьаһалтатыгар култуура управлениетын начаалынньыга. 2001 сыл муус устар ыйыттан саҕалаан от ыйын 25 күнүгэр диэри “СӨ алын сүһүөх урбаанын өйүүр пуонда” бэрэстэбиитэлинэн, 2001 сыл от ыйын 26 күнүттэн ахсынньы 31 күнүгэр диэри Дьокуускайдааҕы Судаарыстыбаннай инженернай-техническэй үнүстүүт преподавателинэн, 2003-2007 сылларга СӨ сиргэ уонна баайга-дуолга сыһыаннаһыы министиэристибэтигэр кылаабынай исписэлииһинэн, 2007-2010 сылларга В.Г. Павлов аатынан “Саха мебель” ААУо генеральнай дириэктэринэн, 2012-2018 сылларга Кындаллааҕы алын сүһүөх оскуола уонна уһуйаан дириэктэринэн, 2018-2019 сылларга “Олоҥхо дойдута” туристическай хампаанньа ХЭТ дириэктэринэн, 2020-2022 сылларга Чурапчы улууһун үөрэҕин управлениетыгар исписэлииһинэн, 2022-2023 сылларга Семен Новгородов аатынан Чурапчы орто оскуолатыгар учууталынан үлэлээн кэллэ.
Сэмэн Жендринскэй