Муус устар 5-7 күннэригэр Хатаска “Дьулуур” саҥа аһыллыбыт спортивнай комплекска олорон эрэ волейболга (ПОДА) өрөспүүбүлүкэтээҕи чемпионат буолан ааста. Уолаттарга 10, кыргыттарга 9 хамаанда иккилии бөлөххө арахсан күрэхтэстилэр. Үс күннээх күрэхтэһии түмүгүнэн эр дьоҥҥо Амма улууһун хамаандата кыайыылааҕынан таҕыста, иккис Мэҥэ Хаҥалас, оттон үһүс Чурапчы хамаандалара буоллулар.
Дьахталларга Дьокуускай куорат хамаандата таҕыста. Иккискэ Мэҥэ Хаҥалас тигистэ, үһүс бириистээх миэстэни биһиги улууспут хамаандата ылла.
Адаптивнай спорка олорон эрэ волейбол элбэх дьон болҕомтотун тардар, сытыы киирсиилээх көрүҥүнэн буолар. Бу көрүҥ Саха сиригэр киэҥник биһирэнэн, күрэхтэһии да, спортсменнар маастарыстыбаларын таһыма үрдээбитин бэлиэтээтим. Манна биһиги улууспут хамаандата бэйэлэрин кыахтарынан кииристилэр.
Ол курдук, кыргыттарбыт сэрэбиэй түмүгүнэн күүстээх бөлөххө түбэһэн, 3-с хамаанда тэҥ очукуоланан, партиялар араастаһыыларын түмүгэр полуфиналга Амма, Нам курдук хамаандалары кэннигэр хаалларан киириилэрэ оонньуу тыҥааһыннаахтык ааспытын туоһулуур.Чемпионат түмүгүнэн хамаанда хапытаана, олорон эрэ волейболга Арассыыйа сүүмэрдэммит хамаандатын чилиэнэ Стас Никитин “Лучший нападающий”, уоппуттаах оонньооччу Дина Оконешникова “Лучший защитник” анал аат хаһаайыннарынан буоллулар. Чемпионат түмүгүнэн улууспут ыччаттара Стас Никитин, Анна Заровняева өрөспүүбүлүкэ сүүмэрдэммит хамаандатыгар киирэн, сотору кэминэн Москваҕа ыытыллыахтаах Арассыыйа кубогар Саха Сирин чиэһин көмүскүү барар буоллулар. Улууспут волейболга хамаандата түмсүүлээх, дьулуурдаах буолан күрэхтэһиилэргэ мэлдьи кыттар уонна өрөспүүбүлүкэ бастыҥ хамаандаларын ортолоругар сылдьаллар. Бу көрүҥҥэ эдэр дьону көҕүлээһин инники сорукпут буолар. Онуоха тириэньэрбит А.Э. Кузьмин үгүс сыратын ууран, утумнаах үлэни-хамнаһы тэрийэр.
Быйылгы күрэхтэһиибитигэр сүүмэрдээһин саҥа аһыллыбыт А.К.Софронов аатынан спорткомплекска ыытылынна. Бу саҥа спорт саала инники ситиһиилэрбититигэр, өрөгөй кыайыыларбытыгар бигэ тирэх буолуо диэн эрэнэбит. Түгэнинэн туһанан, айаммытыгар мэлдьи тырааныспарынан хааччыйар улуустааҕы үөрэх салалтатын кэлэктиибигэр, Чурапчы нэһилиэгин дьаьалтатыгар истиҥник махтанабыт.