Чурапчы ыччата инники күөҥҥэ

Быйыл бэс ыйын 6-8 күннэригэр Кэбээйи улууһугар «Табыс» эдэр ыччат бэстибээлэ төрдүс төгүлүн ыытылынна. Манна биһиги улууспут хамаандата баран кыттан үһүс миэстэ буолан кэллэ. Бу туһунан хаһыаппытыгар хамаанданы салайан, иилээн-саҕалаан илдьэ сылдьыбыт Чурапчы нэһилэгин баһылыгын бастакы солбуйааччыта, улуус эдэр ыччатын сүбэтин, СӨ Ил Түмэн эдэр ыччатын парламенын чилиэнэ Уйгулаан Туласынов сэһэргиир:

«»Табыска» Чурапчы улууһуттан 30 киһилээх хамаанда баран олус көхтөөх кыттыыны ыллыбыт. Уопсайа 6 көрүҥҥэ күрэхтэр ыытылыннылар, ол курдук: «Лидер молодежи», «Голос молодежи» диэн Арассыыйа уонна Саха сирин устуоруйаларын билиигэ викторина, военизированнай эстафета, «Мисс уонна мистер Табыс» уонна многоборьеҕа «Бастыҥ бөҕөс» диэн күрэх. Чурапчыттан ыччаттарбыт чаҕылхайдык кытыннылар, «Голос молодежи» күөн күрэскэ ылбаҕай ырыаларынан үһүс, «Лидер молодежи» Болтоҥоттон Диана Павлова иккис, «Бастыҥ бөҕөскө» Хадаар нэһилиэгиттэн Егор Лукин үһүс миэстэ буолары ситистилэр. Барыы-кэлии, транспорынан, аһынан-үөлүнэн хааччыллыы боппуруостарыгар Чурапчы улууһун уонна нэһилиэгин дьаһалталара күүс-көмө буоллулар.

Саамай киһи бэлиэтиирэ диэн бу аҥардас күрэхтэһии эрэ буолбакка атын үгүс балаһааккаларынан араас хайысхалаах семинардар, байыаннай дьайыы тула төгүрүк остуоллар, маастар кылаастар эмиэ ыытылыннылар.»Росмолодежь» иһинэн ыытыллар бэстибээл буоларын быһыытынан Грант  куонкуруһугар хайдах ситиһиилээхтик кыттар туһунан анал хамыыһыйа кэлэн сырдатта. Бэстибээл кыттыылаахтара бары күүскэ бэлэмнэнэн кэлбиттэрэ тута харахха быраҕыллар, ордук «Голос молодежи» уонна «Мисс и мистер Табыс» ыччат болҕомтотун тарта.

Тоһоҕолоон эттэххэ, бу бэстибээл СӨ ыччатын министиэристибэтин, биһиги улууспут аҕа баһылыга Степан Саргыдаев идиэйэлэринэн бастаан эдэр ыччат ыһыаҕын быһыытынан ыытыллыбыта онтон форматын арыый уларытан, күрэхтэри эбэн бүтүн өрөспүүбүлүкэ ыччатын бэстибээлигэр кубулуйбута. Эрдэ даҕаны Чурапчы ыччата манна сүрдээх көхтөөх, актыыбынай кыттыыны ылар этэ, быйыл бастакыбытын бириистээх миэстэҕэ тахсаммыт үөрүүбүт өссө үрдээтэ.

Түмүккэ улууспут эдэр дьонугар туһаайан улууска да, өрөспүүбүлүкэҕэ да ыытыллар дьаһалларга, тэрээһиннэргэ куруутун бу курдук актыыбынайдык, эдэрдии эрчимнээхтик кыттар буолуҥ диэн этиэм этэ.»

 

Наталья Сибирякова