Арассыыйаҕа Дьиэ кэргэн, өрөспүүбүлүкэҕэ Оҕо саас сылыгар анаан, «Мой бизнес» киин «Семья — Мой бизнес» өрөспүүбүлүкэтээҕи дьиэ кэргэн бэстибээли тэрийэн ыытта. Манна Чурапчыттан урбаанньыт, кондитер Ульяна Заровняева кыттан кэллэ. Киниттэн бэстибээлгэ хайдах сылдьан кэлбитин кэпсииригэр көрдөстүм.
- Ульяна, бэйэҕин уонна дьиэ кэргэҥҥин билиһиннэр эрэ..
- Ульяна Николаевна диэммин, кэргэним Иван Егорович Новгородов. 3 кыыс оҕолоохпут. Улахан кыыс Алдаҥҥа медсиэстэрэ үөрэҕэр 3 кууруска үөрэнэр, орто кыыс 2-с кылаас, кыра кыыс 4 саастаах, «Улыбка» уһуйааҥҥа сылдьар.
- Дьиэ кэргэҥҥит бизнеһин туһунан кэпсиэҥ дуо?
- Дьиэ кэргэнинэн бизнеһи тэриммиппит номнуо 10 сыл буолла. Уон сыл аннараа өттүн кытта тэҥнээн көрдөххө, нэһилиэнньэ бурдук аһыгар, тортка наадыйара элбээбит. Доруоһата суох закваскалаах килиэп, булочнай уонна кондитерскай бородууксуйаны астаан таһаарабыт. Производственнай эбийиэги таһынан бородууксуйабытын батарарга 2016 сыллаахтан киосканы арыйан үлэлэтэбит. Эбии 2019 сыллаахха иккис киоскабытын аспыппыт. Ону таһынан сакааһынан астаан, миэстэҕэ илдьэн биэриини тэрийэбит. Быйыл эбии бэкээринэ-кафены арыйдыбыт. 15 үлэһити үлэнэн хааччыйан, инникитин сайдарга былааннаахпыт.
- Фестивальга кыттыбыккыт туһунан кэпсээ эрэ
- Бу тэрээһиҥҥэ дьиэ кэргэмминээн сылдьан кэллибит, эбии билиини ыллыбыт уонна астына-дуоһуйа сынньанныбыт. Икки күн “Орто дойду” гостиницаҕа түһэрдилэр.Тэрээһини олус үчүгэйдик толкуйдаан оҥорбуттар, үөрэхтэн саҕалаан култуурунай бырагыраамаҕа тиийэ баар. Бириэмэтэ суох төрөппүттэргэ, оҕолоргун кытта сынньанарга табыгастаах. Урбаанньыттары кытта билсэн, маастар-кылаастарга сылдьан, уопут атастаһан, ону таһынан оҕолорбутун кытта тэҥҥэ оонньоон, болҕомто ууран, бэрт туһалаахтык бириэмэбитин атаардыбыт.
Биһиги ыал сайыҥҥы кэмҥэ үлэ үгэнигэр сылдьар буолан, оҕолорбутугар болҕомто тиийбэт, ханна да сынньаммакка сылдьар этилэр, онон оҕолор олус үөрдүлэр. Оҕолорго аналлаах араас бырагыраамалаах тэрээһин бөҕөнү ыыттылар.
Бэйэбит урбаанньыттары кытта билсэн олус астынныбыт. Маннык тэрээһини сыл аайы оҥороллоро буоллар олус учугэй буолуо этэ. Кэлбэтэх урбаанньыттар социальнай ситимҥэ көрөн дэлби ымсыырдылар, интэриэһиргээтилэр.
Онон тэрийээччилэргэ «Мой бизнес» киин үлэһиттэригэр улахан махталбытын тиэрдэбит.
Ольга Монастырева