Улуус дьаһалтатын ыччат дьыалатыгар исписэлииһэ Алгыстаана Федорова салайааччылаах ыччат дэлэгээссийэтэ Г.Е.Скрябин аатынан “Эйгэ” норуот айымньытын дьиэтигэр Мугудай уонна Төлөй ыччаттарыгар бэрт сэргэх тэрээһиннэри ыыттылар.
«Маннык десант биһиэхэ бастакытын ыытыллар буолбатах. Урукку сылларга ыччат дьон мустан, санаабытын үллэстэн, уопут атастаһан, астынан тарҕаһааччыбыт. Уопсайынан Чурапчы киинин ыччата тыа сиригэр лидер талыытын, биир санаа тула түмсүү үлэтин куруутун туруорсар буолан, маннык туһалаах десаннары тэрийэр дии саныыбын.
Бу күн хамаандаҕа арахсан, интэриэһинэй квест оонньууну аастыбыт, бырайыак толкуйдаан көмүскээтибит, ону сэргэ ыллаан-туойан дуоһуйа сынньанныбыт. Ордук бырайыак чааһа көхтөөх буолла. Буолуохтаах да буоллаҕа дии. Ол курдук, тыа ыччатын сүрүн кыһалҕаларын сиһилии аһаҕастык ырытыстыбыт. Нэһилиэккэ кадр тиийбэтин, эбии үлэ миэстэтин таһаарыы туһунан дириҥник толкуйдатар араас санаалары, күүстээх тыллары иһиттибит.
Десант ырыа алыптаах киэһэтинэн түмүктэннэ. Улууспутугар кэрэ да бэйэлээх куоластар баалларыттан сөхтүм. Бэйэм тэҥҥэ ыллаһан чэпчээтим», — диэн Мугудай ыччатын аатыттан Оксана Ушницкая десант туһунан санаатын үллэһиннэ итиэннэ улуус дэлэгээссийэтин үлэтигэр ситиһиилэри баҕарда.
Бэлиэтээн эттэххэ, эдэр ыччаты түмэр, волонтерскай хамсааһыны сайыннарар сыаллаах десант чэрчитинэн быйыл улуус ыччатын дэлэгээссийэтэ нэһилиэктэри кэрийэн, улуус бары ыччатын хабыахтаах. Бу иннинэ Хадаар, Хайахсыт ыччатын кытта үлэлээбитэ.
Марфа Петрова.