Чурапчы улууһун учаастактара ыһыахтаатылар

 

От ыйын 5 күнүгэр Имигиттэҕэ улууспут учаастактарын олохтоохторо мустан ыһыахтаатылар. Ыһыаҕы Хадаар нэһилиэгэ тэрийэн ыытта.

Түһүлгэни киэргэтиигэ, дьиэ кэргэнинэн сахалыы таҥаска, ийэлэр сатабылларын көрүүгэ, уһун суһуохха, оһуохайга  куонкурустар, ону сэргэ эстафетаҕа уонна Хадаар нэһилиэгин Бочуоттаах олохтооҕо Семен Пинигин бирииһигэр «Өбүгэ оонньууларыгар» күрэхтэьии тэрилиннэ.

«100-тэн тахса киһи кэлэн, астына-дуоһуйа ыһыахтаан, махтанан бардылар. Ковид кэнниттэн түмсэ иликпит дииллэр, онон хас биирдии куонкуруска ох курдук оҥостон кэлбиттэр.Култуурунай чааска хастыы да нүөмэри бэлэмнээбиттэр.

«Өбүгэ оонньууларыгар» 16 уол кытынна, уопуттаах спортсменнары киллэрбэтэхпит.  Сүрүн бирииһи Алексей Пинигин матассыыкылы туруорда. Күрэхтэһиилэргэ, куонкурустарга бастаабыттарга 15 тыһ, иккистээбиккэ 10 уонна үһүстээбиккэ 5 тыһ солк сертификаттар туттарылыннылар. Бу бириистэри нэһилиэктэр бары харчынан кыттыһан туруордубут. Эстафета бирииһин улуус дьаһалтата туруорда.

Түмүккэ урут сыл көтө-көтө оҥорор эбит буоллахпытына, сылын аайы оҥоруоҕуҥ дэстибит. Эһиил Сылаҥҥа буоллун диэн баҕа санаабытын эттибит», — диэн Хадаар нэһилиэгин баһылыга Афанасий Степанов кэпсиир.

 

Елена Макаринская