Тыа хаһаайыстыбатын күнүгэр анаммыт үөрүүлээх чаас улуус дьаһалтатын аактабай саалатыгар ыытылынна. Сылын ахсын бу күн бастыҥнар чиэстэнэллэр, салгыы үлэлииргэ эбии күүһү ылыналлар.
Үрүҥ үүтү үрүлүтээччилэри, эмис эти дэлэтээччилэри улуус баһылыга Степан Саргыдаев, улуус дьокутааттарын Сэбиэтин бэрэссэдээтэлэ Яков Оконешников эҕэрдэлээтилэр, наҕараадалары туттардылар. Ол курдук, “Гражданскай килбиэн” бэлиэни Мугудайтан Илья Дьячковскай, “СӨ үтүөлээх фермерэ” ааты Хадаартан Лариса Ноева, “Саха сирин тыатын хаһаайыстыбатын бэтэрээнэ” ааты Чакыртан Михаил Филиппов о.д.а. наҕараадаланнылар.
Чемпион-ыанньыксыт Агафья Кузьмина аатынан бириэмийэни Илья Дьячковскай, РФ үтүөлээх фермерэ Василий Смирников аатынан бириэмийэни Иван Сергеев, меценат Петр Архипов аатынан бириэмийэни Василий Корякин туттулар.
Дьиэ кэргэн ферматын сайыннарыы гранын Аина Анемподистова уонна Гаврил Попов, саҥа хаһаайыстыбаны тэринээччилэргэ анаммыт граны Татьяна Кузьмина уонна Михаил Николаев, ыанары ынаҕы иитиигэ уонна үүтү үрдэтиигэ анаммыт граны Саина Алексеева, сылгыны үөрдээн иитии гранын Айсен Шестаков, Игорь Васильев, тыа хаһаайыстыбатын потребкооперативтарын өйөөһүҥҥэ анаммыт граны Мырылаттан “Эргис” ТХПК уонна тигээйини иитии гранын Күннэй Тимофеева ыллылар.
Елена Макаринская
Сэмэн Жендринскэй хаартыскаҕа түһэриилэрэ