Чурапчы улууһун оҕолоругар ыксаллаах быһыыга-майгыга хайдах буолуохтаахтарын, тугу гыныахтаахтарын туһунан кэпсиир, сэрэтэр үлэлэр ыытыллаллар

Өрөспүүбүлүкэ үөрэхтээһинин систиэмэтигэр оҕо куттала суох буолуута инники күөҥҥэ турар. Ыксаллаах быһыы-майгы буолар түгэнигэр оҕо сөптөөх хамсаныылары оҥороругар туһааннаах үлэ барыахтаах.

Чурапчы улууһугар баһаарынай чаас үлэһиттэрэ сылы эргиччи үөрэх тэрилтэлэрин кэрийэн, оҕолорго ыксаллаах быһыыга-майгыга хайдах буолуохтаахтарын, тугу гыныахтаахтарын туһунан кэпсиир, сэрэтэр үлэни ыыталлар.

“Биһиги уһуйааммытыгар уоттан сэрэхтээх буолуу инструктаһын баһаарынай чаас инструктора Марианна Захарова ыыта кэлэр. Оҕолорго тиийимтиэ буоллун диэн олус интэриэһинэй ойулуктары көрдөрөр, ол кэнниттэн кэпсэтиини таһаарар, ыйытыыларга эппиэттиир.

Оҕолорбутуттан күһүн маарыланан оҥоһуллубут маасканы илдьэ кэлэллэрин ирдиибит, мааскаларбытын бөлөхтөрүнэн чугас уура сылдьабыт. Күн аайы сэрэхтээх буолуу ирдэбиллэрин үөрэтэбит, саната сылдьабыт. Кыра оҕоттон саҕалаан, улаханыгар тиийэ уоттан сэрэхтээх буолуу быраабылаларын билиэхтээхпит уонна тутуһуохтаахпыт”, — диэн Чурапчы нэһилиэгин “Мичил” уһуйаан сэбиэдиссэйин солбуйааччыта Сардаана Макарова кэпсиир.

Елена Макаринская