Бүгүн, Дьокуускай куорат 4-с нүөмэрдээх оҕо ыспартыыбынай оскуолатын уораҕайыгар мини-футбол көрүҥэр өрөспүүбүлүкэтээҕи турнир буолан түмүктэннэ.
Манна полуфиналга, биһиги уолаттарбыт 2:1 ахсааҥҥа Томпо улууһун кыайаннар, финалга Хаҥалас улууһун кытары кииристилэр. Түмүккэ 3:1 ахсаанынан кылбар кыайыыны ситистилэр! Бу успуорт көрүҥэр Чурапчы улууһа аан бастакытын чөмпүйүөн үрдүк аатын ылла.
Чурапчыттан мини-футболга бүгүҥҥү күн дьоруойдара кимнээҕий? Улуус сүүмэрдэммит хамаандатын састаабыгар: Алексей Павлов, Уйусхан Оконешников, Александр Назаров, Родион Сысолятин, Айсен Адамов, Николай Михайлов, Семен Федоров, ини-бии Василий, Михаил Жирковтар, Леонид Петров, Анатолий Борисов, Сергей Павлов, Семен Стручков, Илларион Аммосов, Петр Сивцев, Чаҕыл Попов, Альберт Марков киирэн оонньоотулар.
Наҕараада кэмигэр, Чурапчыбыт улууһун биир киэн туттар ыаллара Яков Павлович уонна Оксана Григорьевна Оконешниковтар төрөппүт уоллара Уйусхан — “Лучший игрок”, “Лучший бомбардир” диэн анал номинациялары ылаттаан, чахчы даҕаны үчүгэй оонньооччу буоларын дакаастаата.
Уолаттарга кытаанах доруобуйаны, өссө даҕаны үрдүк чыпчааллары баҕарыаҕын!
Сэмэн Жендринскэй