Россияҕа Дьиэ кэргэн, өрөспүүбүлүкэбитигэр Оҕо саас, улууспутугар Ыал саргыта сылларын чэрчитинэн, улуустааҕы дьахталлар пленумнара ыытылынна.
Пленум сыалынан “Ыал саргыта” бырайыак иитинэн дьахталлар түмсүүлэрин үлэтин кииннээн уонна күүһүрдэн биэрии, тирээн турар билиҥҥи кыһалҕалары учуоттаан, 3 сыллаах үлэ былаанын ылыныы буолар.
Пленум үөрүүлээх аһыллыытыгар улуус баһылыга Степан Саргыдаев, улуус дьокутааттарын Сэбиэтин бэрэссэдээтэлэ Яков Оконешников мустубут кэрэ аҥардары сааскы маҥнайгы бырааһынньыгынан эҕэрдэлээтилэр. Улуус дьаһалтатын уонна Эр дьон сэбиэтин аатыттан тюльпан сибэккилэр бэлэхтэннилэр.
Улуус дьахталларын Сэбиэтин бэрэссэдээтэлэ Анастасия Афанасьева ыытыллыбыт үлэ-хамнас туһунан отчуоттаата.
СӨ Ил Дарханын иһинэн тэриллибит байыаннай дьайыыга сылдьааччыларга көмөлөһөр координационнай киин чилиэнэ Светлана Диодорова онлайн сибээһинэн тахсан, байыаннай дьайыыга сылдьааччыларга уонна кинилэр дьиэ кэргэттэригэр аналлаах туох-ханнык үлэ барыахтааҕар тохтоото.
Улуус баһылыгын социальнай боппуруостарга солбуйааччыта Мария Кронникова “Ыал саргыта” бырайыак туһунан кэпсээтэ, байыаннай дьайыы кыттыылаахтарын дьиэ кэргэттэрин Сэбиэтин билиһиннэрдэ.
Уопсастыбаннай сэбиэт бэрэссэдээтэлэ Екатерина Иванова “Ыал саргыта” бырайыакка дьахтар хамсааһынын туһатын, киин балыыһа акушер-бырааһа Анна Попова улууска төрүүр саастаах дьахталлар доруобуйаларын уонна абортка кэтээн көрүүлэрин, ГТАС салайааччыта Туяра Шапошникова улууска ыал буолуу уонна арахсыы статистикатын, о.д.а. иһитиннэриилэри оҥордулар.
Пленум түмүгүнэн улуустааҕы дьахтар Сэбиэтэ инникитин хайдах үлэлиэхтээҕэр резолюцияны ылыннылар.
Елена Макаринская