Кулун тутар 27 күнүгэр, Дьокуускай куоракка өрөспүүбүлүкэ алын академиятын быһаарыылаах сүбэ мунньаҕын хамыыһыйата тэрилиннэ. Манна Саха сирин 200 бастыҥ үөрэнээччилэрэ 2024 сылга бырайыактыыр уонна олимпиада үлэлэригэр талыллан киирдилэр.
Куораттартан итиэннэ 24 улуус 121 үөрэҕин кыһаларыттан 541 сайаапка киирбит. Куонкуруска 1-11 кылаас үөрэнээччилэрэ кыттыыны ылбыттар.
Биһиги Чурапчыбыт улууһуттан СӨ алын академиятын дьиҥнээх чилиэттэринэн: Тихон Каженкин аатынан Арыылаах орто оскуолатын 8 кылаас үөрэнээччитэ Альберт Иванов, Иван Павлов аатынан Чурапчы орто оскуолатын 9 кылааһын үөрэнээччитэ Эрсан Макаров, Семен Новгородов аатынан Чурапчы орто оскуолатын 8 кылааһын үөрэнээччитэ Сандаара Кононова, Семен Новгородов аатынан Чурапчы орто оскуолатын 6 кылааһын үөрэнээччитэ Николай Данилов, Степан Макаров аатынан Чурапчы гимназиятын 8 кылааһын үөрэнээччитэ Коля Собакин, гимназия 10 кылааһын үөрэнээччитэ Ньургун Васильев, гимназия 6 кылааһын үөрэнээччитэ Данил Брызгаев буоллулар. Онтон чилиэн-кэрэспэдьиэннэринэн: Степан Макаров аатынан Чурапчы гимназиятын 6 кылааһын үөрэнээччитэ Аман Сивцев, гимназия 10 кылааһын үөрэнээччитэ Дарина Кривошапкина, гимназия 11 кылааһын үөрэнээччитэ Уйгу Гуляева, Николай Субуруускай аатынан Болтоҥо орто оскуолатын 10 кылааһын үөрэнээччитэ Вероника Вензель ааттаннылар.
“Бу оҕолорбутун барыларын алын академия чилиэттэрэ буолбуттарынан итиитик-истиҥник эҕэрдэлиибин. Үөһэ ааттаммыт үөрэнээччилэр мээнэҕэ талыллыбатылар, тоҕо диир эбит буоллахха хамыыһыйа манна өрөспүүбүлүкэнэн эрэ муҥурдаммакка, Арассыыйаҕа тиийэ ситиһиилээх үөрэнээччилэри көрөр. Сыл устата бу үөрэнээччилэр араас хабааннаах сорудахтары толоруохтара, элбэх научнай ону тэҥэ Арассыыйа таһымнаах олимпиадаларга кыттыыны ылыахтара. Онтон кэрэспэдьиэннэр быыстала суох бэйэлэрин хайысхаларынан суруксуттуохтара. Манна үчүгэйэ диэн сыл устата үөрэнээччилэргэ ыйын аайы стипендиялар түһэр буолаллар, холобура алын академия чилиэттэрэ 3 тыһ.солк онтон чилиэн-кэрэспэдьиэннэр счеттарыгар 2-лии тыһ.солк тутар буолуохтара. Оҕолор үлэлэригэр сүрдээх улахан өйөбүл, манна хаһыс да сылын үлэлэһэр үөрэнээччилэрдээхпитинэн киэн туттабыт”, — диэн Степан Макаров аатынан Чурапчы гимназиятын дириэктэрин научнай үлэҕэ солбуйааччы, СӨ үтүөлээх учуутала, СӨ алын академиятын Чурапчы улууһунааҕы координатора, педагогическай наука хандьыдаата Ирина Соловьева кэпсээтэ.
Сэмэн Жендринскэй