Чурапчыга быйыл аһыллыбыт Дьиэ кэргэҥҥэ элбэх өҥөнү оҥорор киинин үлэтэ күннэтэ күөстүү оргуйар. Манна улууспут дьиэ кэргэттэрэ араас хайысхалаах көмөнү, сүбэни-аманы ылаллар. Ол курдук, киин исписэлиистэрэ оҕо төрөөбүтүнэн биир кэмнээх пособие, элбэх оҕолоох ыал чэпчэтиилэрин, Ийэ хапытаалын ылалларыгар, анаталларыгар, «Эдэр дьиэ кэргэн» бырагырааманан 35-гэр диэри саастаах ыал, доруобуйаларынан хааччахтаахтарга туһааннаах көмө, чэпчэтии, ипотека, налоговай вычет уонна да атын дьиэ кэргэҥҥэ аналлаах бары ыйытыыларга хоруйу булаллар, ыйан-кэрдэн биэрэллэр. Маны таһынан нэһилиэнньэ ордук наадыйар өҥөтүнэн логопед, психолог уонна АФК кабинетын өҥөлөрө буолар. Билиҥҥи туругунан тохсунньу ыйтан олохтоохтортон 400-тэн тахса киһи көмө, өйөбүл көрдөөбүтүттэн 100-тэн ордуга чуолаан логопед дьарыгын туһаныы.
Дьиэ кэргэн киинин сэбиэдиссэйэ Галина Кожурова: «Логопедка суруйтарбыт дьиэ кэргэттэр оҕолоро аан бастаан үс исписэлиискэ диагностика ааһаллар. Ол эбэтэр, логопеды таһынан психолог уонна АФК инструктора туһааннаах оҕону көрөн-истэн чопчу хайдах дьарыкка наадыйарын, саҥарарыгар ханнык дорҕоонноро тиийбэтин, эт-хаан, өй-санаа өттүнэн эрчийэргэ чуолаан туохха улахан болҕомто ууруллуохтааҕын быһааран баран, тус маршрутнай илиис оҥороннор дьарыктыыллар. Күн бүгүн дьон быыстала суох ыйыталаһаллар, холобур, билигин логопедка бу саас суруйтарбыттар уочараттара кэлэн дьарыктана сылдьаллар. Нэһилиэктэр оҕолорун күн аайы таһаллара кыайтарбат буоллаҕына, оҕо манна биһиги кииммитигэр үрдүттэн олорон эрэ бу исписэлиистэргэ реабилитацияны ааһар.
Биһиги кииммит маны таһынан оҕолорго сайыҥҥы сынньалаҥы тэрийэр, билигин «Кыыс куо» диэн күнүскү лааҕыр бастакы сезона саҕаланна, манна 5-7 кылаас кыргыттара сылдьаллар. Бэлиэтээн эттэххэ, бу «Кыыс куо» иитээччибит Марианна Олесова бырайыагынан былырыыҥҥыттан үлэтин саҕалаабыта. Ааспыт сылга 10, быйыл 5 кыыс сылдьан эрэллэр. Ону тэҥэ реабилитационнай киин иһинэн икки сыл «Безопасный июль» диэн учуокка турар эрдэҕэс саастаах уолаттарга аналлаах лааҕыр сезона ыытыллыбыта, быйыл эмиэ Дьиэ кэргэн киинигэр 7 уолу хабан үлэлиэ. Атырдьах ыйыгар «Уоланнар (полевой сбор)» күнүскү лааҕыр үһүс сезона 5-с кылаастан үөһэ саастаах уолаттарга үлэлиирэ былааннанар»,-диэн кылгастык билиһиннэрэр.
Дьиэ кэргэҥҥэ элбэх өҥөнү оҥорор кииммит, аата да этэрин курдук, дьэ улууспут дьиэ кэргэттэригэр бары өттүнэн туһалаахтык, олус көдьүүстээхтик үлэлии турар. Хас биирдии үлэһит оҕолорго истиҥ сыһыаннааҕа, үлэтигэр бэриниилээҕэ тута көстөр, оттон дьарыктана кэлэр оҕолор да, төрөппүттэр да олус астыналларын, чахчы туһаналларын үөрэн туран бэлиэтииллэр.
Наталья Сибирякова