Бэҕэһээ, кулун тутар 12 күнүгэр, Саха сиригэр 12 эбийиэк тэҥинэн үлэҕэ киирбит үөрүүлээх түгэнин көрдүбүт-иһиттибит. Бу эбийиэктэртэн иккитигэр, СӨ Ил Дархана Айсен Николаев быһа биэриигэ тахсан быһаччы кыттыыны ылла.
“Алта сыл анараа өттүгэр дойду Бэрэсидьиэнэ хас биирдии киһи олоҕун таһымын үрдэтэргэ улахан соруктары туруорбута уонна бүгүн биһиги бу сүҥкэн үлэ дьиҥнээх түмүктэрин көрөбүт. Сахабыт сирэ Арассыыйаттан улахан өйөбүлү ылар, биһиги өрөспүүбүлүкэбит национальнай бырайыактары үбүлээһиҥҥэ үһүс миэстэни ылар. 2018 сылтан саҕалаан барыта холбоон 329 социальнай эбийиэк үлэҕэ киирдэ, ааспыт сылга 57, урукку сылларга 20-30 эбийиэги тутан олоххо киллэрэ эбит буоллахпытына, үүммүт 2024 сылга 76 улахан эбийиэктэри тутан олоххо киллэрэр былааннаахпыт. Сыл саҕаланыытыгар хаарбах дьиэттэн көһөрүү быраагыраамматынан 21 элбэх кыбартыыралаах дьиэлэри арыйдыбыт, 3 улахан социальнай эбийиэк үлэлэрин саҕалаатылар, кинилэр истэригэр Илин Уһук эрэгийиэҥҥэ соҕотох онкологическай кииммит үлэтин киэн тутта ааттыыбыт. Маннык суолталаах күҥҥэ, саҥа дьиэ үөрүүлээх арыллыытгар дон-сэргэ мэлдьи миигин ыҥырар, ол эрэн элбэх тутуу тэҥнэн үлэҕэ киирэр буоланнар бүгүн СӨ Бырабыыталыстыбатын уонна улуустар баһылыктарын көрдөһүүлэринэн бүгүн онлайн-эрэсииминэн быһа биэриигэ таҕыстым. Сырыы аайы саҥа эбийиэктэр, дьону бэйэлэрин хаачыстыбаларынан, толору хааччылыыларынан үөрдэллэр. Аҕыйах сыллааҕыта тыа сирин балыыһаларыгар компьютернай томограф туруо диэн өйгө даҕаны суоҕа оттон бүгүн, Чурапчы оройуонугар КТ-ны ааһа баран МРТ туруорулунна. Онон Чурапчы олохтоохторо ыраата барбаккалар, эрдэттэн профилактикаланан доруобуйаларын туругун бөҕөргөтүнэр кыахтаннылар. Итини сэргэ, улуус дьаһалтатын көҕүлээһининэн Чурапчыга культурнай ыспартыыбынай комплекс тутуллан киирбититтэн үөрэбит. Инникитин даҕаны Олимпиецтар уһуйуллан тахсалларыгар эрэнэбит ”, — диэн Айсен Сергеевич бэлиэтээтэ.
“Кулун тутар 12 күнэ, Чурапчыбыт улууһун устуоруйатыгар букатыннаахтык сурулунна. Дьон-сэргэ олоҕор сүҥкэн суолталаах үс улахан эбийиэги арыйдыбыт. Бастатан туран, Егор Борисов аатын сүгэр архыып-бибилэтиэкэтэ, Чурапчылар өр кэмҥэ кэтэспит Прокопий Сокольников аатынан балыыһа иккис уочараттаах тутуута уонна дьэ, Чурапчы – успуорт туоната диэн мээнэҕэ ааттамматахпыт, онон сүрдээх элбэҕи эрэннэрэр, улахан олимпийскай чөмпүйүөннэр иитиллэн тахсыахтара диэн Афанасий Софронов аатынан успуорт уораҕайа киирбитинэн Чурапчым дьонун-сэргэтин барыларын итиитик-истиҥник эҕэрдэлиибин. Бу үлэ-хамнас барыта бэйэ-бэйэлэрин кытары ыксары ситимнээхтэр, итини таһынан Чурапчы туруу үлэһит дьонноох-сэргэлээх буолан, бары биир өйүнэн-санаанан салайтаран, улахан салайааччылардаах, улахан үлэһит дьонноох буоламмыт бу маннык тутуулар биһиэхэ ыытыллаллар. Түгэнинэн туһанан, Дойдубут бэрэсидьиэнигэр Владимир Владимировичка, өрөспүүбүлүкэбит Ил Дарханыгар Айсен Сергеевичка, СӨ Бырабыыталыстыбатыгар, бу улахан тутууларбытыгар үлэлээбит-хамсаабыт бары тутуу бөдөҥ тэрилтэлэригэр “Адгезия” ХЭТ, “РТ-Инжиниринг” ХЭТ, “СибТрансСтрой” тутааччыларыгар дириҥ, истиҥ махтал тылларбытын аныыбыт. Кинилэри сэргэ махтанабыт өрөспүүбүлүкэбит биир кэлим сакаастыыр сулууспатыгар, кинилэр баар буоланнар Сахабыт сиригэр элбэх тутуулары ыытаннар, хонтуруоллааннар эбийиэктэри кэмигэр үлэҕэ киллэрэллэриттэн астынабыт. Үтүө дьыаланан дьарыктанар “Моя Якутия в 21 веке” улахан тэрилтэбитигэр эмиэ махтал тылларын тиэрдэбит”, — диэн Чурапчы улууһун баһылыга Степан Саргыдаев санаатын үллэһиннэ.
Сэмэн Жендринскэй. Андрей Сорокин хаартыска тиксэриитэ