Бүгүн — Оһуохай Күнэ! Тойукка туойуллубут тоҕус томтордоох, ырыаҕа ылламмыт хатыҥ чараҥнардаах Чурапчыбыт барахсан үтүө-мааны дьоно-сэргэтэ, ытык ыалдьыттара оһуохайга таҕыстылар!
Сарсыарда 11.00 чаастан, Чурапчы нэһилиэгин киин болуоссатыгар, оһуор сайын олбохтоох, үс күөгэйэр түбэлээх “ТҮӨЛЛЭР ДОБУН ОҺУОХАЙ!” этилиннэ. Бу күн, Чурапчыбыт улууһугар аан бастакытын “Кырыымпа” бөлөх (сал. Дмитрий Попов) оһуохай саҕаланыан бэйэлэрин сатабылларын көрдөрдүлэр итиэннэ оһуохай кэмигэр тэтими тутарга эбии доҕуһуол, көмө буоллулар.
Оһуохайы Кытаанах нэһилиэгиттэн Давид Андреев, Хайахсыт нэһилиэгиттэн Владислав Поисеев, Болтоҥо нэһилиэгиттэн Валентина Дьячковская, Хатылы нэһилиэгиттэн Зоя Мохначевская уонна Чурапчы нэһилиэгиттэн Валерий Герасимов таһаардылар.
Санатан эттэххэ, быйыл, 2024 сылга Саха сиригэр ыам ыйын 25 күнүгэр аан бастакытын Оһуохай күнэ бэлиэтэнэр. Бырааһынньык 2023 сыллаахха Ил Дархан Айсен Николаев балаҕан ыйын 7 күнүнээҕи ыйааҕынан ылыныллыбыта.
Тэрээһин оҕону, ыччаты национальнай үҥкүүгэ сыһыарар сыаллаах ыытыллар диэн, Чурапчы улууһун култуураҕа управлениетыгар эттилэр.
Ыам ыйын 22 күнүгэр Чурапчыбыт улууһугар “Эдэр ыччат оҕолор, эбэ алаас аайы түһүлгэтэ кэҥээтэ, төлкөлөрө тубуста” диэн оскуоланы саҥа бүтэрээччилэргэ анаммыт оһуохай этиллибитэ.
Ыам ыйын 27 күнүгэр Былатыан Ойуунускай аатынан Саха тыйаатырыгар Сергей Зверев-Кыыл Уола аатынан үҥкүү национальнай тыйаатыра “Айыы аймах биhигэ” музыкальнай-хореографическай испэктээги туруоруоҕа.
Сэмэн ЖЕНДРИНСКЭЙ. Ааптар хаартыскаҕа түһэриитэ