Эбиэт иннигэр кини «Мындаҕаайы» ТХПК уонна Одьулууҥҥа Иван Парфенов салайааччылаах бааһынай хаһаайыстыбаҕа сырытта.
«Мындаҕаайы» ТХПК саҥа хотон тутуутун, оттон «Комплекс» бааһынай хаһаайыстыба хотон реконструкциятын туруорсаллар.
Эбиэт кэнниттэн Артём Александров нэһилиэктэр баһылыктарын, тыа хаһаайыстыбатын исписэлиистэрин уонна хаһаайыстыбалар салайааччыларын кытта оттооһун боппуруоһугар мунньаҕы оҥордо.
Мунньах кыттыылаахтара ардахтатыы, мобильнай биригээдэ, оту тиэйии-таһыы ороскуотун толуйуу, сылгыны иитии, эдэр ыччаты дэриэбинэҕэ олохсутуу, о.д.а туһунан ыйыттылар.
Миниистир хас биирдии ыйытыыга чопчу хоруйдары биэрдэ.
Улуустан 40-ча мобильнай биригээдэттэн сайаапка киирэн турар. Тиэйии-таһыы ороскуотун улуус дьаһалтата эрдэттэн толуйарын эттэ.
Салгыы миниистир «Чурапчы» ТХПК арыы уонна халбаһы сыаҕын көрдө, үлэни үчүгэйинэн сыаналаата.
Миниистир эбийиэктэри саҥардыыга бырайыагы оҥороллоругар этиитин киллэрдэ.
Елена Макаринская